Чарговы расійскі БПЛА “паляцеў у бок Беларусі” мінулай ноччу — УСУ

8 студзеня, Позірк. У перыяд з 19:30 7 студзеня да 8:00 8 студзеня адзін расійскі беспілотны лятальны апарат “паляцеў у бок Беларусі”, паведамляюць Паветраныя сілы Узброеных сіл Украіны.

Адзначаецца, што мінулай ноччу РФ атакавала Украіну 64 БПЛА, 41 дрон быў збіты, 22 “лакацыйна страчаныя”.

Паводле звестак маніторынгавай групы “Беларускі Гаюн”, у паветраную прастору Беларусі за мінулыя суткі ўварвалася не менш за 17 расійскіх БПЛА, дзяжурная авіяцыя беларускага войска ў паветра не падымалася.

Раней украінскія Паветраныя сілы паведамлялі аб залёце на беларускую тэрыторыю расійскіх дронаў у ноч на 17, 18, 20, 22, 26, 27, 28 кастрычніка, 1, 3, 10, 11, 12, 13, 20, 22, 25, 26, 27 лістапада, 2, 3, 6 і 13, 22 снежня і 1 студзеня.

4 кастрычніка Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна, украінскія яны ці расійскія.

Залёт БПЛА ў Беларусь ён патлумачыў неспрактыкаванасцю аператараў, адзначыўшы, што пасля ўздзеяння сродкаў радыёэлектроннай барацьбы апараты губляюць арыенцір.