У 2024 годзе МАЗ прадаў у РФ амаль на 11% менш новых грузавікоў, чым год таму

11 студзеня, Позірк. У снежні 2024 года на расійскім рынку было прададзена 579 новых грузавікоў Мінскага аўтамабільнага завода — на 3,2% больш, чым у тым жа месяцы 2023-га (561), гаворыцца ў даследаванні “АСМ-холдынг” (РФ).

За мінулы год беларускае прадпрыемства рэалізавала 5.719 адзінак гэтай тэхнікі (за 2023 год — 6.406; -10,7%).

Прадукцыя Мінскага аўтазавода ў мінулым месяцы заняла 6-е месца ў спісе самых прадаваных брэндаў гэтага сегмента аўтарынка Расіі (за месяц да таго — 7-е), канстатавалі эксперты. Доля на рынку склала 4,6% (4,9%).

Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).

На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як у цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.

Лукашэнка таксама адзначыў, што пры рэалізацыі ў РФ па схеме “вытворца — генеральны імпарцёр — дыстрыбутар — дылер — канчатковы спажывец” кошт грузавой і пасажырскай тэхнікі МАЗа ўзрастае — на 20%.

15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці адмысловых ахоўных захадаў праз актыўную экспансію кітайскіх вытворцаў”.

“Гаворка не проста пра падвышэнне імпартных пошлін, тут поля для манеўру амаль няма. Я маю на ўвазе антыдэмпінгавыя і спецабаронныя захады”, — сказаў Снапкоў.

Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі відавочная, а дынаміка іх продажаў палохае.