Хрэнін: Мы ўжо даўно ваюем
22 лютага, Позірк. Беларусь “літаральна знаходзіцца ў прыфрантавой паласе”, заявіў міністр абароны Віктар Хрэнін на ўрачыстым сходзе, прысвечаным Дню абаронцаў Айчыны і Узброеных сіл, 21 лютага ў Мінску.
“Ацэньваючы сітуацыю праз прызму гібрыднай вайны, можна канстатаваць, што мы ўжо даўно ваюем і робім усё, каб атрымаць перамогу без бітвы”, — цытуе кіраўніка Міністэрства абароны прэс-служба ведамства.
Сцвярджаючы, што “глабальнае супрацьстаянне паміж Захадам і Усходам” трансфармавалася “ў ваенны канфлікт ва Украіне”, Хрэнін сказаў: “Росту напружанасці ў рэгіёне спрыяе набіраючая тэмпы мілітарызацыя дзяржаў — членаў Паўночнаатлантычнага альянсу. Побач з пастаяннымі заклікамі да як мага хутчэйшага размяшчэння на сваіх тэрыторыях ваенных кантынгентаў НАТО, Польшча і краіны Балтыі актыўна павялічваюць баявы патэнцыял нацыянальных узброеных сіл”.
Паводле яго слоў, Беларусь, у сваю чаргу, прымае “самыя рашучыя меры” па нарошчванні баявой магутнасці арміі, “не ўцягваючыся пры гэтым у гонку ўзбраенняў”.
Значную ролю ў гэтым працэсе ён адвёў беларускаму абаронна-прамысловаму комплексу і “цеснаму ваенна-тэхнічнаму супрацоўніцтву з Расіяй”.
Пацвярджэннем “вышэйшага ўзроўню ўзаемадзеяння братэрскіх дзяржаў” ён назваў размяшчэнне на тэрыторыі Беларусі расійскай тактычнай ядзернай зброі, а таксама прынятае рашэнне аб размяшчэнні “зброі будучыні — ракетнага комплексу “Арэшнік”.
Улады пастаянна выкарыстоўваюць у прапагандысцкіх мэтах наратыў пра адсутнасць вайны ў краіне і “мірнае неба”.
Начальнік Генеральнага штаба Узброеных сіл Павел Муравейка ў лістападзе 2024 года заяўляў, што “мірнае неба — гэта не нешта ўмоўнае, абстрактнае”: “Гэта сапраўды калі свеціць сонца, няма дыму ад палаючых гарадоў, вёсак, лясоў, калі не чакаеш прылёту беспілотнікаў, снарадаў”.
Аднак на тэрыторыю Беларусі рэгулярна залятаюць расійскія беспілотнікі, якія збіваюцца беларускай СПА. У прыватнасці, 10 лютага заляцелі адразу 10 БПЛА.
4 кастрычніка мінулага года Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна ад таго, украінскія яны ці расійскія.
Залёт БПЛА ў Беларусь ён растлумачыў недасведчанасцю аператараў, адзначыўшы, што пасля ўздзеяння сродкаў радыёэлектроннай барацьбы апараты губляюць арыенцір.
Афіцыйныя ведамствы часцей за ўсё не каментуюць залёт расійскіх дронаў у Беларусь.
Рэжым Лукашэнкі бесперапынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
У лютым 2022 года ўварванне было ажыццёўлена ў тым ліку з беларускай тэрыторыі.
