17 верасня, Позірк. Вільнюс мае дакладнае разуменне таго, што адбываецца ў Беларусі і не збіраецца глядзець на сітуацыю “праз ружовыя акуляры”. Пра гэта, паводле інфармацыі партала Delfi, заявіў 16 верасня нацыянальнаму вяшчальніку LRT прэзідэнт Літвы Гітанас Наўседа.
“Мы не надзелі ружовыя акуляры, праз якія хацелі б бачыць прыгожага Лукашэнку. Мы бачым яго такім, які ён ёсць”, — сказаў ён.
“У нас ёсць наша пазіцыя, мы яе дэкларавалі. У некаторых выпадках яна ўзгодненая з пазіцыяй ЕС. Забарона на экспарт беларускіх угнаенняў дзейнічае на ўзроўні ЕС. Яе працягнулі на 12 месяцаў, вернемся да пытання ў пачатку наступнага года, калі Літва будзе старшынстваваць у Савеце ЕС”, — адзначыў літоўскі прэзідэнт.
16 верасня па выніках перамоў у Мінску спецпрадстаўніка прэзідэнта ЗША па Беларусі Джона Коўла і Аляксандра Лукашэнкі вызвалена 25 палітвязняў, яны былі вывезены ў Літву.
Афіцыйныя асобы Літвы пастаянна абвяргаюць ціск ЗША па пытанні адмены санкцый у дачыненні да беларускіх калійных угнаенняў пасля таго, як яны былі адмененыя Вашынгтонам у адказ на вызваленне папярэдняй групы палітвязняў.
