У дзень вывазу палітвязняў Літва ўпершыню за тыдзень не зафіксавала спробаў незаконнай міграцыі з тэрыторыі Беларусі

Апублікавана на адкрытай версіі “Позірку” 17 верасня 2026 года ў 19:34

17 верасня, Позірк. Ніводнай спробы пранікнення нелегальных мігрантаў з тэрыторыі Беларусі не зафіксавала Служба аховы дзяржаўнай мяжы (САДМ) Літвы 16 верасня, калі з Беларусі ў гэтую Балтыйскую краіну была вывезеная група палітвязняў.

Да гэтага сем дзён запар САДМ адзначала актыўнасць нелегалаў. Паводле падлікаў “Позірку”, праведзеных на падставе аператыўных сутачных звестак службы, з 9 па 15 верасня было зарэгістравана 132 спробы пераходу, што склала 8,6% усіх спробаў (1.540) з пачатку года на літоўскім кірунку.

16 верасня прэм’ер-міністр Літвы Міндаўгас Сінкявічус на сустрэчы са спецпрадстаўніком прэзідэнта ЗША па Беларусі Джонам Коўлам заявіў, што “дыпламатычнае ўзаемадзеянне ЗША з Беларуссю“ спрыяла “вызваленню палітвязняў, а таксама зніжэнню ўзроўню гібрыдных пагроз і напружанасці ў рэгіёне”.

Актыўнасць мігрантаў на беларуска-літоўскай мяжы, як сведчыць аналіз “Позірку“, расце трэці месяц. Калі ў чэрвені было зафіксавана 94 спробы пераходу (пасля 108 у траўні і 481 у красавіку), то ў ліпені — 163, у жніўні — 312, за 16 дзён верасня — 193.

Удзельная вага Літвы ў агульнай колькасці незаконных спробаў пранікнення з Беларусі ў ЕС наземным шляхам вырасла з 3,9% у чэрвені да 6,4% у ліпені, да 17,9% у жніўні і да 20,6% у верасні.

Пры гэтым доля Латвіі, якая ў 2026 годзе адчувае найбольшы міграцыйнае ціск, знізілася з 95,6% у чэрвені да 89,4% у ліпені, да 79% у жніўні і да 70,3% у верасні. Нелегалы спрабуюць перасекчы беларуска-латвійскую мяжу штодня з 25 сакавіка (176 дзён запар).

Міграцыйны крызіс на мяжы Беларусі і краін ЕС працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія пагранічнікі не будуць спыняць нелегальных мігрантаў, якія ідуць у Еўрасаюз праз Беларусь, таму што іх туды нібыта паклікалі.