Для былой палітзняволенай, журналісткі Луцкінай сабраная запытаная сума

8 сакавіка, Позірк. 7.048 еўра сабрана для былой палітзняволенай, журналісткі Ксеніі Луцкінай.

4 сакавіка фонд салідарнасці BySol паведаміў, што Луцкіна вывезеная з Беларусі, у той жа дзень быў абвешчаны збор у памеры 7 тыс. еўра.

BySol адзначаў, што экс-палітзняволеная мае цяжкае захворванне, якое патрабуе лячэння. “Таму мы разлічваем, што большая частка сродкаў пойдзе на медыцыну і яшчэ трохі застанецца для адаптацыі“, — адзначалася ў тлумачальным паведамленні.

Сума была сабраная за чатыры дні.

Да жніўня 2020 года Луцкіна працавала ў Белтэлерадыёкампаніі. Пасля прэзідэнцкіх выбараў далучылася да страйку супрацоўнікаў холдынгу, пазней звольнілася і ўвайшла ў асноўны склад Каардынацыйнай рады па ўрэгуляванні палітычнага крызісу. Была затрыманая ў снежні 2020 года.

8 верасня 2022 года Мінскі гарадскі суд прыгаварыў Луцкіну да 8 гадоў пазбаўлення волі паводле ч. 1 арт. 357 Крымінальнага кодэкса (змова ці іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам).

У апошнім слове Луцкіна прасіла суд аб “літасці і гуманнасці“, аб “магчымасці вярнуцца ў грамадства і прыносіць яму карысць, загладзіць сваю віну словам і справай”. Яна нагадала пра сваю хваробу — пухліну мозгу — і што мае патрэбу ў медыцынскай дапамозе на волі.

16 жніўня 2024 года Аляксандр Лукашэнка падпісаў указ аб памілаванні 30 асоб, асуджаных за злачынствы “пратэстнай накіраванасці“. 20 жніўня стала вядома, што Луцкіна на волі.

У сацсетках Луцкіна падзякавала BySol за садзейнічанне ў выездзе: “Не проста дапамаглі, але і выратавалі“.