9 сакавіка, Позірк. Беларускаму добраахвотніцкаму фарміраванню імя Кастуся Каліноўскага споўнілася тры гады, паведамляе тэлеграм-канал палка.
Адзначаецца, што за гэты час “падраздзяленне прайшло праз самыя гарачыя кропкі вайны”.
“Дзясяткі воінаў палка аддалі свае жыцці. Дзясяткі адзначаныя дзяржаўнымі ўзнагародамі. Барацьба працягваецца!” — гаворыцца ў паведамленні.
Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных сіл Украіны, а 21 траўня было абвешчана аб яго трансфармацыі ў полк.
У Беларусі па факце стварэння ПКК распачатая крымінальная справа, ён прызнаны “экстрэмісцкім фарміраваннем”, любая дапамога ці намер яе аказання, жаданне ўступіць у полк жорстка пераследуецца ўладамі.
25 верасня стала вядома, што ПКК прызнаны беларускімі ўладамі “тэрарыстычнай арганізацыяй”. У адказ на гэта полк заявіў, што прызнае “тэрарыстычнай арганізацыяй” рэжым Аляксандра Лукашэнкі.
