Па факце гібелі 17-гадовай дзяўчыны ў аўтааварыі ў Лунінецкім раёне распачатая крымінальная справа

11 сакавіка, Позірк. У выніку аўтамабільнай аварыі ў Лунінецкім раёне (Брэсцкая вобласць) загінула 17-гадовая дзяўчына, вынікае з паведамлення, апублікаванага 11 сакавіка прэс-службай Следчага камітэта.

Трагедыя адбылася 7 сакавіка, аднак ведамства паведаміла пра тое, што адбылося, толькі цяпер.

Паводле звестак следства, у той дзень каля 20:00 на 8-м кіламетры аўтадарогі Н-37 (Лунінец — Прыпяць) 19-гадовы кіроўца легкавога “Фальксвагена” не даў рады кіраванню на “закругленні жвіровай дарогі” і пратараніў агароджу моста. Аўтамабіль перакуліўся ў меліярацыйны канал.

Апрача 17-гадовай дзяўчыны ў салоне знаходзілася яшчэ двое пасажыраў (21 і 15 гадоў). Іх і кіроўцу выратавалі відавочцы аварыі.

У дачыненні да кіроўцы ўзбуджаная крымінальная справа паводле ч. 2 арт. 317 КК (парушэнне правілаў дарожнага руху асобай, якая кіруе транспартным сродкам, што пацягнула з неасцярожнасці смерць чалавека).

9 сакавіка прэс-служба Міністэрства ўнутраных спраў паведамляла пра дарожна-транспартнае здарэнне са смяротным вынікам у Лельчыцах (Гомельская вобласць). Тады ў аварыі загінула 15-гадовая дзяўчынка.