15 сакавіка, Позірк. Улады Злучаных Штатаў Амерыкі разглядаюць “магчымасць увядзення ўсёабдымных абмежаванняў на паездкі для грамадзян дзясяткаў краін”, паведамляе брытанскае інфармагенцтва Reuters.
Адзначаецца, што падрыхтаваны спіс, у якім больш за 40 краін падзелена на тры групы.
Да групы краін, у дачыненні да якіх прапануецца прымяніць поўнае прыпыненне дзеяння віз, аднесеныя Афганістан, Венесуэла, Емен, Іран, КНДР, Куба, Лівія, Самалі, Сірыя, Судан.
Гаіці, Лаос, М’янма, Паўднёвы Судан, Эрытрэя — у групе дзяржаў, да якіх можа быць прымененае частковае прыпыненне (тычыцца турыстычных, студэнцкіх ды некаторых іншых віз).
Краіны, у дачыненні да якіх рэкамендаванае частковае прыпыненне, калі яны не ліквідуюць недахопы: Ангола, Антыгуа і Барбуда, Беларусь, Бенін, Буркіна-Фасо, Бутан, Вануату, Гамбія, Дамінікана, Дэмакратычная Рэспубліка Конга, Каба-Вэрдэ, Камбоджа, Камерун, Ліберыя, Малаві, Маўрытанія, Пакістан, Рэспубліка Конга, Сан-Тамэ і Прынсіпі, Сьера-Леонэ, Сэнт-Кітс і Нэвіс, Сэнт-Люсія, Туркменістан, Усходні Тымор, Чад, Экватарыяльная Гвінея.
“Чыноўнік ЗША, які размаўляў на ўмовах ананімнасці, папярэдзіў, што ў спіс могуць быць унесеныя змены і што ён яшчэ не ўхвалены адміністрацыяй, уключаючы дзяржсакратара ЗША Марка Рубіа”, — піша Reuters.
Прэзідэнт ЗША Дональд Трамп дамагаўся змены міграцыйнай палітыкі краіны падчас свайго першага тэрміна ў 2017–2021 гадах і працягнуў пастрожваць яе ад самага пачатку свайго другога тэрміна (атрымаў паўнамоцтвы ў студзені 2025-га).
