На прадпрыемстве ў Ганцавічах здарылася ўцечка карбамідна-аміячнай сумесі

8 кастрычніка, Позірк. Уцечка вадкага ўгнаення — карбамідна-аміячнай сумесі — з дзвюх металічных ёмістасцей здарылася ўдзень 7 кастрычніка на тэрыторыі прадпрыемства ў Ганцавічах (Брэсцкая вобласць), гаворыцца ў сутачнай зводцы Міністэрства па надзвычайных сітуацыях.

“Ратавальнікі аднавілі абвалаванне для прадухілення далейшага разліву, арганізавалі збор сумесі, якая выцекла, у спецыяльныя ёмістасці, — адзначае МНС. — З дапамогай распыленых вадзяных струменяў праводзілася зніжэнне канцэнтрацыі аміяку, які выпараўся ў атмасферу”.

Пасля ліквідацыі няспраўнасцей была вымераная канцэнтрацыя пароў сумесі ў паветры. Сцвярджаецца, што “за межамі абвалавання перавышэння не зафіксавана”.

Прычына ўцечкі высвятляецца. На фоне інцыдэнту была сабраная камісія па надзвычайных сітуацыях пры Ганцавіцкім райвыканкаме.

Раней паведамлялася, што ўначы 6 кастрычніка на адкрытай пляцоўцы склада на тэрыторыі Гомельскага хімічнага завода здарылася ўцечка каля 50 кг аміяку. “Ратавальнікі спынілі выхад рэчыва шляхам перакрыцця засаўкі”, — заявіла ведамства паводле вынікаў ліквідацыі інцыдэнту.

Ранкам 20 красавіка на прадпрыемстве “Гродна Азот” адбылося пазапланавае спыненне цэха аміяк-3 “са спыненнем узаемазвязанага з ім па сыравіне цэха карбамід-3”. Адміністрацыя тады папярэдзіла, што “пры спыненні і наступных пускавых аперацыях цэха аміяк-3 з мэтай утылізацыі гаручых рэчываў, якія ўваходзяць у склад тэхналагічнага газу, рэгламентам прадугледжана яго кароткачасовае спальванне на факельнай устаноўцы”.