МНС папярэджвае пра галалёдзіцу і ўзмацненне ветру 17 сакавіка

17 сакавіка, Позірк. Пра галалёдзіцу на асобных участках дарог Беларусі папярэдзіла 17 сакавіка Міністэрства па надзвычайных сітуацыях.

Чакаецца пераменная воблачнасць. У многіх раёнах прагназуюцца кароткачасовыя ападкі — у асноўным снег, мокры снег. Хуткасць ветру — паўночна-заходняга і паўночнага — складзе 4­–9 метраў на секунду з парывамі да 14 м/с, удзень месцамі парывы ​​да 15–18 м/c. Тэмпература паветра — да 3 градусаў цяпла.

Шкала Бофарта класіфікуе вецер хуткасцю 4–5, 6–7 і 8–10 м/c як слабы, умераны і свежы адпаведна (3, 4 і 5 балаў з 12), 14–17 м/с — моцны (7 балаў), 18–20 м/с — вельмі моцны (8 балаў).

Прагназаваныя ўмовы надвор’я, папярэджвае МНС, могуць прывесці да “ўскладнення руху транспарту, павелічэння верагоднасці ўзнікнення дарожна-транспартных здарэнняў, рызыкі траўматызму насельніцтва”. Не выключана пашкоджанне ліній сувязі і электраперадачы, парушэнне электразабеспячэння, адключэнне электрычных падстанцый і электраэнергіі ў населеных пунктах, а таксама пашкоджанне або абвальванне слаба ўмацаваных канструкцый, дахаў будынкаў, збудаванняў, падзенне дрэў.