Ціханоўская прыбыла ў Харватыю для ўдзелу ў Дуброўніцкім форуме

11 ліпеня, Позірк. На запрашэнне міністра замежных спраў Харватыі Гордана Грліч-Радмана дэмакратычны лідар Святлана Ціханоўская прыбыла ў гэтую краіну, каб узяць удзел у Дуброўніцкім форуме.

Палітык напісала 11 ліпеня на сваёй старонцы ў сацыяльнай сетцы Х, што ў рамках візіту сустрэнецца з харвацкім прэм’ер-міністрам Андрэем Пленкавічам і спікерам парламента Горданам Яндракавічам.

Форум праходзіць 11–12 ліпеня ў Дуброўніку. Ціханоўская возьме ўдзел у панэлі “SOS: Заходнія каштоўнасці ў крызісе?”

Агулам ў двухдзённай праграме Дуброўніцкага форуму запланавана 16 панэльных дыскусій па шырокім коле тэм, уключаючы геапалітычныя выклікі і гандлёвыя стасункі паміж кантынентамі, гаворыцца на сайце мерапрыемства.

26 студзеня 2023 года Ціханоўская сустракалася з Пленкавічам і Грліч-Радманам. Бакі абмяркоўвалі пашырэнне санкцый супраць афіцыйнага Мінска, падтрымку дэмакратычных сіл і дыяспары.

Арганізатарам Дуброўніцкага форума з’яўляецца Міністэрства замежных і еўрапейскіх спраў Харватыі. Праходзіць з 2006 года (першапачаткова называўся Харвацкі саміт, Харвацкі форум).