Ціханоўская абмеркавала з еўракамісарам Кос падтрымку беларускіх СМІ

18 сакавіка, Позірк. Павелічэнне падтрымкі незалежных беларускіх СМІ, у тым ліку “Радыё Свабода”, абмеркавалі на сустрэчы 18 сакавіка ў Бруселі дэмакратычны лідар Святлана Ціханоўская і камісар па пытаннях пашырэння Еўрасаюза Марта Кос.

Як паведаміла ў сваім ютуб-канале беларускі палітык, на сустрэчы таксама ўздымаліся тэмы дапамогі рэпрэсаваным у Беларусі, выдачы віз і спрашчэння легалізацыі беларусаў у Еўропе.

“Я яшчэ раз нагадала еўрапейскім партнёрам, што Беларусь — гэта не буфер паміж Захадам і Расіяй. Гэта частка Еўропы, і беларусы, якія былі вымушаныя з’ехаць, павінны адчуваць сябе тут у бяспецы”, — адзначыла Ціханоўская, маючы на ўвазе свой выступ 18 сакавіка на пасяджэнні Савета ЕС па агульных пытаннях.

“Мы гаварылі шмат і пра палітвязняў: многія знаходзяцца ў рэжыме інкамунікада, і мы павінны працягваць змагацца за вызваленне кожнага і кожнай”, — сказала дэмлідар.

У згаданым пасяджэнні, як раней паведамлялася, удзельнічалі міністры краін ЕС, адказныя за агульнаеўрапейскія пытанні. У сваім выступе сярод іншага Ціханоўская заклікала еўрапейскіх міністраў памятаць, што “вайна Расіі пачалася з Беларусі, нават не ў 2022 годзе, а з падаўлення <…> праеўрапейскіх пратэстаў у 2020 годзе”.

Савет ЕС па агульных пытаннях — адна з 10 фармацый Савета Еўрапейскага саюза.

Гэты орган якая каардынуе падрыхтоўку да пасяджэнняў Савета ЕС, адказвае за шэраг скразных напрамкаў палітыкі. Савет у асноўным складаецца з міністраў па еўрапейскіх справах з усіх дзяржаў – членаў ЕС. Еўрапейскую камісію звычайна прадстаўляюць адпаведныя камісары ў залежнасці ад пытанняў, якія абмяркоўваюцца.

Сярод пытанняў парадку дня яго сённяшняга пасяджэння — падрыхтоўка да сустрэчы Савета ЕС 20–21 сакавіка, дзе, сярод іншага, будуць абмяркоўвацца сітуацыя ва Украіне і пытанні міграцыі.