Пакуль Лукашэнка ва ўладзе, Еўрасаюзу будзе пагражаць небяспека — Ціханоўская
18 сакавіка, Позірк. Пакуль ва ўладзе ў Беларусі будзе знаходзіцца Аляксандр Лукашэнка, Еўрапейскаму саюзу будзе пагражаць небяспека, заявіла 18 сакавіка ў Бруселі на пасяджэнні Савета ЕС па агульных пытаннях дэмакратычны лідар Святлана Ціханоўская, паведамляе тэлеграм-канал палітыка.
У пасяджэнні ўдзельнічалі міністры краін Еўрасаюза, якія адказваюць за агульнаеўрапейскія пытанні.
“Літаральна на мінулых выходных мы пабачылі сотні новых спробаў перасячэння нелегальнымі мігрантамі межаў [Беларусі] з Польшчай, Літвой і Латвіяй. Гэта не проста пагроза. Гэта шантаж. Беларусь паказвае, што дэмакратыя і бяспека шчыльна пераплеценыя: калі ўрад не паважае свой народ, ён не будзе паважаць і сваіх суседзяў”, — сказала Ціханоўская.
У сваім выступе, як паведаміў “Позірку“ галоўны дарадца дэмлідара Франак Вячорка, яна заклікала еўрапейскіх міністраў памятаць, што “вайна Расіі пачалася з Беларусі, нават не ў 2022 годзе, а з задушэння <…> праеўрапейскіх пратэстаў у 2020 годзе”.
“Калі б мы перамаглі тады, цяпер сітуацыя была б зусім іншай. Калі мы хочам спыніць Пуціна, Беларусь з’яўляецца ключавым элементам”, — лічыць Ціханоўская.