БЧ праводзіць рэканструкцыю шляхоў для павелічэння паставак у расійскія парты

19 сакавіка, Позірк. Беларусь і РФ у 2025 годзе плануюць завяршыць шэраг работ па рэканструкцыі чыгуначных шляхоў для павелічэння перавозак тавараў у паўночна-заходнія расійскія парты. Пра гэта агенцтву РІА “Навіны” паведаміў першы намеснік генеральнага дырэктара Расійскіх чыгунак Сяргей Паўлаў.

Паводле яго слоў, у работах, акрамя РЧ, удзельнічае і Беларуская чыгунка (БЧ).

“Імкнемся як мага хутчэй завяршыць рэканструкцыю ўчастка, які звязвае Беларусь і нашы парты Паўночнага Захаду, і рухацца далей у развіцці нашых адносін. У тым ліку і порт Мурманск абмяркоўвалі”, — сказаў Паўлаў.

Чыноўнік адзначыў, што таксама бакамі абмяркоўваўся “аб’ём беларускіх грузаў, пад які разлічана пашырэнне падыходаў да партоў Бронка і Санкт-Пецярбург”.

“У тых праектных рашэннях, якія выкарыстоўваюць беларусы ў Бронцы, у іх гэта разлічана да 20 млн тон. Але тут мы павінны разам з нашымі калегамі з Беларусі, з чыгуначнікамі, з урадамі, менавіта скаардынавана развіваць свае вытворчыя магутнасці. Чым мы цяпер і займаемся. Вось зараз мы разам праводзім рэканструкцыю. Яны ў сябе, мы ў сябе”, — дадаў Паўлаў.

“Мы абавязкова гэта выканаем, таму што зацікаўленыя ў аб’ёмах перавозак з Беларусі сапраўды гэтак жа, як і беларусы зацікаўленыя ў павелічэнні аб’ёму перавозак праз Расію”, — дадаў ён.

10 сакавіка “Позірк“ паведамляў, што беларускія ўлады разлічваюць на значнае павелічэнне аб’ёмаў перавалкі грузаў праз марскія парты на паўночным захадзе Расіі. Гэта вынікае са службовага ліста міністра транспарту і камунікацый Аляксея Ляхновіча, накіраванага кіраўніку Мінтранса РФ Раману Старавойтаву.

Дакумент, датаваны 26 чэрвеня 2024 года, мае грыф “Для службовага карыстання”. Яго копію “Позірку“ прадаставіла аб’яднанне былых сілавікоў BelPol.

“Паважаны Раман Уладзіміравіч! — піша Ляхновіч (арфаграфія захаваная). — Дазвольце падзякаваць Вам за канструктыўнае ўзаемадзеянне па ўмацаванні двухбаковага супрацоўніцтва ў транспартнай сферы паміж нашымі краінамі”.

У дакуменце гаворыцца аб фарміраванні “тэхнічных умоў (зыходных даных) на пералік мерапрыемстваў і патрабаванняў тэхнічнага і тэхналагічнага характару па будаўніцтве і рэканструкцыі чыгуначнай інфраструктуры ў напрамку партоў паўночнага захаду Расійскай Федэрацыі”.

Ляхновіч паведамляе, што “рэзервовы прырост пры магутнасцях чыгуначнай інфраструктуры беларускага экспартнага грузу толькі па асноўных пазіцыях перавысіць больш чым у два разы аб’ём 2023 года” і складзе пры максімальнай загрузцы каля 47 млн 278,0 тыс. тон штогод.

Удакладняецца, што перавалку калійных угнаенняў плануецца павялічыць у 2,9 раза да ўзроўню 2023 года (да 17 млн тон), нафтапрадуктаў — у 1,8 раза (да 16,5 млн тон), угнаенняў мінеральных змешаных — у 2,2 раза (да 1,1 млн тон), коксу і бітуму — у 1,8 раза (да 1,2 млн тон), прадуктаў дрэваапрацоўкі — у 2,6 раза (да 9,4 млн тон), чорных металаў — у 1,2 раза (да 2,1 млн тон).

“Міністэрства транспарту і камунікацый Рэспублікі Беларусь, карыстаючыся выпадкам, аднаўляе Міністэрству транспарту Расійскай Федэрацыі свае запэўніванні ў сваёй высокай павазе”, — заяўляе ў лісце міністр.

11 верасня 2024 года Ляхновіч паведаміў, што Беларусь выкарыстоўвае для перавалкі сваёй прадукцыі 14 расійскіх партоў.

Аб’ём вывазу беларускай прадукцыі праз партовую інфраструктуру РФ, паводле слоў чыноўніка, за студзень — жнівень вырас на 10% у параўнанні з аналагічным перыядам 2023 года.

“Беларускія грузы экспартуюцца па чыгунцы больш чым у 90 краін свету, — заявіў Ляхновіч. — У 2024 годзе геаграфія паставак пашырылася за кошт такіх краін, як Сенегал, Перу, Малі, Уругвай, Эфіопія, Гвінея-Бісаў, Бенін, Туніс, Алжыр і іншых”.

Паводле яго слоў, “ствараюцца неабходныя ўмовы для нарошчвання аб’ёмаў экспартных паставак прадукцыі айчынных прадпрыемстваў кантэйнерамі на рынак Кітая”.

Неабходнасць у перавалцы грузаў праз расійскія парты ўзнікла ў сувязі з заходнімі санкцыямі і адмовай літоўскіх партоў працаваць з Мінскам.

22 красавіка было падпісана пагадненне аб тым, што ТАА “Марскі тэрмінал “Вароты Арктыкі” пабудуе ў Мурманску да 2028 года вялікі порт для перавалкі беларускіх грузаў. Праектным рашэннем прадугледжаны аб’ёмы перавалкі да 25–30 млн тон у год.