Колькасць эканамічных злачынстваў за год вырасла амаль на 20%
22 сакавіка, Позірк. У 2024 годзе ў Беларусі было зарэгістравана 73.270 злачынстваў — на 14,2% менш, чым у 2023-м (85.374), сведчыць праведзены “Позіркам” аналіз даных Нацыянальнага статыстычнага камітэта.
Згодна з афіцыйнай статыстыкай, выяўлена 37.839 грамадзян, якія здзейснілі злачынствы (38.660; -2,1%).
Колькасць злачынстваў, здзейсненых “супраць парадку ажыццяўлення эканамічнай дзейнасці”, за год стала большай на 19,3% (рост з 1.560 да 1.861).
Як “выраб, захоўванне або збыт падробленых грошай або каштоўных папер” было кваліфікавана 470 зарэгістраваных злачынстваў, або 25,3% (566; -17%), “ухіленне ад выплаты сум падаткаў, збораў” — 283, або 15,2% (229; +23,6%), “набыццё або збыт матэрыяльных каштоўнасцяў, загадзя здабытых злачынным шляхам”, — 66, або 3,6% (50; +32%).
Выяўлена 1.086 асоб, якія здзейснілі злачынствы эканамічнага характару (651; +66,8%).