У Гродне затрыманы былы палітвязень, ён аказаў супраціў і зламаў руку сілавіку — МУС

27 сакавіка, Позірк. У Гродне затрыманы мужчына, які знаходзіўся ў вышуку “за падзеі 2020 года”, паведамляе прэс-служба Міністэрства ўнутраных спраў.

Адзначаецца, што 26 сакавіка каля 23 гадзін “пры адпрацоўцы гаражнага масіва” супрацоўнікі МУС “спынілі падазронага маладога чалавека”. “Дакументаў пры ім не аказалася, а названыя ім асабістыя даныя адсутнічалі ў базе”, — гаворыцца ў паведамленні.

“Грамадзяніну прапанавалі прайсці ў тэрытарыяльнае ўпраўленне для высвятлення асобы. Раптам, з ужываннем падручных сродкаў, ён аказаў вартавым парадку актыўны супраціў, зламаўшы аднаму з іх руку. Спрабуючы збегчы, скокнуў у раку, дзе быў затрыманы”, — заявілі ў МУС.

“Падчас разбору высветлілася”, падкрэслівае ведамства, што мужчына “знаходзіўся ў вышуку за гвалт у дачыненні да супрацоўнікаў органаў унутраных спраў”.

“У жніўні 2020 года падчас групавога парушэння грамадскага парадку ён распыліў у твар праваахоўнікам газавы балончык. Тады абвінавачаны пакінуў краіну, а праз некаторы час нелегальна вярнуўся ў Беларусь, дзе хаваўся ад крымінальнага пераследу па цяперашні час”, — адзначаецца ў рэлізе.

Паведамляецца аб шпіталізацыі “пацярпелага міліцыянта”, “дзеянням зламысніка даецца прававая ацэнка”.

Паводле звестак праваабарончага праекта “Права маюць”, затрыманы — былы палітвязень Мікіта Самарын.

11 снежня 2020 года ён быў асуджаны на чатыры гады абмежавання волі з накіраваннем у папраўчую ўстанову адкрытага тыпу паводле арт. 364 Крымінальнага кодэкса (гвалт альбо пагроза прымянення гвалту ў дачыненні да супрацоўніка органаў унутраных спраў). Яго абвінавацілі ў распыленні газу ў твар супрацоўніку АМАП.

Паводле інфармацыі праваабарончага цэнтра “Вясна”, Самарына затрымалі 5 кастрычніка 2020 года, пасля чаго “кінулі ў мікрааўтобус у кайданках, зацягнутых на запясцях — у яго засталіся шнары ад рэзаных ран”. “Проста ў аўтобусе яму нажом абрэзалі доўгія валасы. У галоўным упраўленні арганізаванай злачыннасці яму загадалі даць паказанні пад пагрозай вывезці ў лес і завядзеннем крымінальнай справы на затрыманага з ім сябра”, — гаворыцца на сайце праваабарончага цэнтра.

У сакавіку 2021 года Гродзенскі абласны суд зрабіў больш жорсткім пакаранне Самарыну, прызначыўшы яму 2,5 года пазбаўлення волі. Гэта адбылося па выніках разгляду апеляцыйнай скаргі боку абвінавачвання.

На пасяджэнне ў суд мужчына не з’явіўся. Пазней ён пакінуў Беларусь.