На дом у Пінску медыяменеджара і журналіста Дзікавіцкага накладзены арышт

31 сакавіка, Позірк. На дом у Пінску (Брэсцкая вобласць), які застаўся ў спадчыну ад бацькі журналісту, медыяменеджару, кіраўніку праекта Belarus Tomorrow Аляксею Дзікавіцкаму, накладзены арышт.

“Той самы на рагу вуліцаў Гогаля і Пралетарскай, у якім жыла ўся нашая вялікая сям’я, <…> адкуль я 35 гадоў таму паехаў у інстытут, а яшчэ праз восем пайшоў “выкупаць нявесту” — будучую маю жонку. Той, у якім памерла мая бабуля”, — напісаў мужчына на сваёй старонцы ў “Фэйсбуку”.

Журналіст верыць, што “ў новай Беларусі” яму ды іншым, “у каго незаконна адбіраюць” нерухомасць, яе вернуць, а “вінаватыя адкажуць у адпаведнасці з законам”.

Дзікавіцкі дагэтуль не ведае, што канкрэтна яму інкрымінуюць.

У кастрычніку 2024 году ўлады наклалі арышт на бацькоўскі дом Дзікавіцкага ў вёсцы Мястковічы (Пінскі раён).

Дзікавіцкі быў намеснікам дырэктара тэлеканала “Белсат”, калі яго ўзначальвала Агнешка Рамашэўска-Гузы, пасля яе звальнення выконваў абавязкі кіраўніка. Летась у лістападзе датэрмінова пакінуў пасаду.