Мінск 20:37

Расійскі лоўкостар “Победа” аднавіў рэйсы з Масквы і Санкт-Пецярбурга ў Мінск

Ілюстрацыйнае фота: William Hook / unsplash.com

5 красавіка, Позірк. З надыходам вясенне-летняга лётнага сезона расійская авіякампанія-лаўкостар “Победа” (“Перамога”; уваходзіць у групу “Аэрафлот”) аднавіла рэйсы з расійскіх гарадоў у беларускую сталіцу.

Паводле анлайн-табло нацыянальнага аэрапорта Мінск, 4 красавіка прыбыло два самалёты “Боінг 737-800” гэтай кампаніі: з Санкт-Пецярбурга (аэрапорт Пулкава) у 19:15, а таксама з Масквы (Унукава) — у 21:55 (паводле раскладу мусіў прыляцець у 21:15).

Як паведаміла прэс-служба “Победы”, усе месцы ў гэтых самалётах былі занятыя.

У зваротным кірунку лайнеры кампаніі вылецелі са спазненнем: у Санкт-Пецярбург — у 20:05 замест 19:45, Маскву — у 22:40 замест 21:45.

Раней паведамлялася, што расійскія авіякампаніі “Победа” і “Рэд Вінгс” у новым сезоне адновяць фарматы выканання рэйсаў у Мінск — штодзённыя палёты з Масквы і Санкт-Пецярбурга, а таксама рэгулярныя з Ульянаўска, Уфы і Архангельска. “Аэрафлот” збіраецца павялічыць частату палётаў паміж сталіцамі Беларусі і РФ да сямі разоў на дзень (улетку — 49 рэйсаў штотыдзень).

Авіякампанія “Ікар” (сумесна з Nordwind) планавала з красавіка аднавіць рэйсы з Пермі ў Мінск (два разы на тыдзень).

Падзяліцца: