Арыштаваны дом сям’і Цапкалы прададзены з аўкцыёну з чацвёртай спробы

9 красавіка, Позірк. Дом экс-прэтэндэнта на пасаду прэзідэнта Валерыя Цапкала прададзены з аўкцыёну 9 красавіка, вынікае з паведамлення на пляцоўцы e-auction.by.

Выніковая сума здзелкі склала 1 млн 157 тыс. 200 рублёў (каля 365,7 тыс. долараў).

Гэта была чацвёртая спроба продажу нерухомасці Цапкалы. Папярэднія таргі (20 лістапада 2024 года, 15 студзеня і 26 лютага 2025-га) не адбыліся праз адсутнасць ахвотных. Пры гэтым кошт дома пастаянна зніжаўся.

Стартавая цана дома складала 2 млн 104 тыс. рублёў.

Двухпавярховы катэдж плошчай 418,3 м2, размешчаны на вуліцы Цяплічнай у Мінску, быў выстаўлены на аўкцыён у сярэдзіне кастрычніка. З ім прадавалася ўсё дамавое абсталяванне, прадметы інтэр’еру і зямельны ўчастак плошчай 0,1411 га.

У доме ёсць склеп, тэраса, навес, на тэрыторыі пабудавана альтанка з мангальнай зонай, ёсць гаспадарчая пабудова.

Адзначалася, што маёмасць арыштаваная, у дачыненні да яе дзейнічае забарона суда на ўчыненне рэгістрацыйных дзеянняў. У доме зарэгістраваныя тры чалавекі, у тым ліку двое непаўналетніх.

9 красавіка 2024 года з другой спробы на аўкцыёне была прададзеная трохпакаёвая кватэра Цапкалы ў Мінску па адрасе вул. Чарнышэўскага, 5 агульнай плошчай 103,7 кв.м. Выніковы кошт нерухомасці склаў 395 тыс. 720 рублёў 27 капеек (пачатковы — 286 тыс. 753 рублёў 76 капеек). У таргах удзельнічала тры чалавекі. У жыллі зарэгістраваны адзін чалавек.

Цапкала завочна прыгавораны да 17 гадоў пазбаўлення волі. Рашэнне па выніках закрытага працэсу вынес 7 красавіка 2023 года суддзя Мінскага абласнога суда Сяргей Епіхаў. Пракурор запытваў на два гады больш. Цапкалу прызналі вінаватым паводле дзевяці артыкулаў Крымінальнага кодэкса.