Ціханоўская разлічвае на падтрымку беларусаў з боку Даніі, якая на паўгода стала старшынёй Савета ЕС

1 ліпеня, Позірк. Дэмакратычны лідар Святлана Ціханоўская разлічвае, што Данія, якая на найбліжэйшыя паўгода стала старшынёй Савета ЕС, будзе падтрымліваць беларусаў у іх барацьбе за свабоду.

Акрамя таго, палітык разлічвае на лідарства Капенгагена “ў абароне дэмакратыі, умацаванні еўрапейскай еднасці”.

Ціханоўская таксама падзякавала Польшчы за “моцнае і прынцыповае старшынства ў Савеце ЕС” у папярэднія паўгода.

“Вашае кіраўніцтва трымала свабоду, бяспеку і дэмакратычную Беларусь у цэнтры еўрапейскага парадку дня”, — канстатавала яна.

Савет ЕС — адзін з ключавых інстытутаў Еўрасаюза, які прадстаўляе інтарэсы ўрадаў краін — членаў аб’яднання. Савет ЕС сярод іншага прымае законы і рэгулюе палітыку ў розных сферах (разам з Еўрапарламентам); падпісвае і зацвярджае міжнародныя дагаворы і пагадненні ад імя ЕС.

Краіна, якая старшынствуе ў Савеце ЕС, адказвае за падрыхтоўку і правядзенне пасяджэнняў розных канфігурацый (па знешніх справах, эканоміцы, экалогіі ды інш.); фармуе парадак дня; прапануе прыярытэты і ключавыя тэмы, якія будуць абмяркоўвацца і вырашацца на працягу паўгода; выступае медыятарам і каардынатарам.

Рэгулярная ратацыя забяспечвае раўнапраўе краін — членаў ЕС, разнастайнасць прыярытэтаў і поглядаў, зніжае цэнтралізацыю ўлады.