Урачы-стаматолагі для дарослых і дзяцей аб’яднаныя ў адну спецыяльнасць рашэннем Міністэрства аховы здароўя

10 красавіка, Позірк. Пастановай Міністэрства аховы здароўя з наменклатуры пасад медыцынскіх, фармацэўтычных работнікаў выключаная пасада “урач-стаматолаг дзіцячы“.

Як паведамляе прэс-служба ведамства, рашэнне аб выключэнні пасады “урач-стаматолаг дзіцячы“ прынятае “з мэтай паляпшэння даступнасці стаматалагічнай дапамогі на ўсіх узроўнях, у тым ліку ў сельскай мясцовасці, за кошт больш шырокага кола лекараў-спецыялістаў стаматалагічнага профілю, здольных яе надаць“.

Згодна з пастановай, абавязкі дзіцячых стаматолагаў будуць ускладзеныя на лекараў стаматолагаў-тэрапеўтаў.

У Міністэрстве аховы здароўя адзначылі, што падрыхтоўка кадраў для надання стаматалагічнай дапамогі насельніцтву ў медуніверсітэтах ажыццяўляецца паводле адзінага адукацыйнага стандарта вышэйшай адукацыі па спецыяльнасці “Стаматалогія“, дзе студэнты “авалодваюць базавымі практычнымі навыкамі па ўсіх раздзелах стаматалогіі, у тым ліку стаматалогіі дзіцячага ўзросту“. Набыццё “неабходных практычных навыкаў і кампетэнцый для надання тэрапеўтычных і хірургічных відаў стаматалагічнай дапамогі (як даросламу, так і дзіцячаму насельніцтву) ажыццяўляецца пры праходжанні інтэрнатуры“.

Пасля заканчэння інтэрнатуры прысвойваецца кваліфікацыя “урач-стаматолаг-хірург“ без падзелу на дзіцячага і дарослага, “дадзены спецыяліст можа аказваць хірургічную стаматалагічную дапамогу даросламу і дзіцячаму насельніцтву без дадатковага навучання і займаць пасаду ўрача-стаматолага-хірурга ў арганізацыях аховы здароўя, якія аказваюць медыцынскую дапамогу даросламу і (або) дзіцячаму насельніцтву“, адзначаюць у ведамстве.

У сувязі з прыняццем пастановы будуць аб’яднаны дзве спецыяльнасці інтэрнатуры “стаматалогія дзіцячая“ і “стаматалогія тэрапеўтычная“ ў адзіную спецыяльнасць інтэрнатуры “стаматалогія тэрапеўтычная і дзіцячая“ з прысваеннем адзінай кваліфікацыі “урач-стаматолаг-тэрапеўт“. Пасля праходжання такой інтэрнатуры ўрач-спецыяліст, як паведамляецца, “будзе валодаць кампетэнцыямі да аказання тэрапеўтычных відаў стаматалагічнай дапамогі, як даросламу, так і дзіцячаму насельніцтву без абмежаванняў і дадатковай падрыхтоўкі“.

Паведамляецца таксама, што дзіцячыя стаматалагічныя кабінеты, аддзяленні, паліклінікі, сістэма паслядыпломнай падрыхтоўкі лекараў-спецыялістаў (курсы павышэння кваліфікацыі), якія аказваюць стаматалагічную дапамогу дзіцячаму насельніцтву, а таксама “выбудаваная сістэма надання стаматалагічнай дапамогі дзецям не зменіцца“.

Раней Міністэрства аховы здароўя адрэгулявала тарыфы на платныя медыцынскія паслугі па прыёмах (кансультацыях) урачоў-спецыялістаў.

З 1 лютага 2025 года “устаноўлены новы парог цэн на платныя медпаслугі (акрамя прыёмаў/кансультацый урачоў-спецыялістаў стаматалагічнага профілю)“.

Гаворка ідзе пра ўсе медпаслугах, якія надаюць юрыдычныя асобы незалежна ад формы ўласнасці і падпарадкаванасці, а таксама тых, якія аказваюць і індывідуальныя прадпрымальнікі.

Раней было ўведзенае цэнавае рэгуляванне стаматалагічных паслуг. Яно “патрэбнага эфекту не дало пакуль”, заявіў Раман Галоўчанка, які займаў тады пасаду кіраўніка ўрада, прымаючы 5 сакавіка 2024 года з дакладам міністра аховы здароўя Аляксандра Хаджаева.