Дыпламаты Беларусі і РФ абмеркавалі супрацу з Лацінскай Амерыкай, “перспектывы развіцця стасункаў” з Паўночнай Амерыкай

11 красавіка, Позірк. “Асноўныя кірункі супрацы” Мінска і Масквы з дзяржавамі Лацінскай Амерыкі і Карыбскага басейна абмеркавалі на кансультацыях 10 красавіка ў расійскай сталіцы дэлегацыі знешнепалітычных ведамстваў на чале з намеснікам міністра замежных спраў Беларусі Яўгенам Шастаковым і намеснікам кіраўніка МЗС РФ Сяргеем Рабковым.

Паводле інфармацыі беларускага міністэрства, бакі “абмяняліся думкамі пра развіццё сітуацыі і інтэграцыйных працэсаў у рэгіёне Лацінскай Амерыкі і Карыбскага басейна”.

“Асобным блокам разгледзелі актуальны стан і перспектывы развіцця стасункаў з Паўночнай Амерыкай”, — заявіла прэс-служба МЗС.

Расійскае знешнепалітычнае ведамства па выніках кансультацый згадала толькі пра “пытанні, звязаныя з цяперашняй сітуацыяй у Лацінскай Амерыцы і Карыбскім басейне, а таксама супрацай з краінамі рэгіёну”. Сцвярджаецца, што “абмен меркаваннямі” прайшоў у “адкрытым таварыскім ключы і пацвердзіў супадзенне адзнак бакамі закранутай праблематыкі”.

Беларусь у апошнія гады імкнецца актывізаваць гандлёва-эканамічныя і палітычныя стасункі з краінамі Лацінскай Амерыкі і Карыбскага басейна, у тым ліку з Кубай, Венесуэлай, Нікарагуа ды інш.

Звяртае на сябе ўвагу таксама тое, што беларуска-расійскія кансультацыі прайшлі на фоне перагаворнага працэсу паміж Расіяй і Злучанымі Штатамі Амерыкі. Дыялог з РФ, як сцвярджае адміністрацыя прэзідэнта Дональда Трампа, неабходны для завяршэння вайны ва Украіне.

Прадстаўнікі рэжыму Лукашэнкі настойваюць на тым, што Беларусь павінна быць удзельніцай патэнцыйных мірных перагавораў.