Праезд у грамадскім транспарце даражэе па ўсёй краіне

11 красавіка, Позірк. У Віцебскай вобласці даражэе праезд у грамадскім транспарце згодна з рашэннем Віцебскага аблвыканкама ад 31 сакавіка № 252.

Адпаведны дакумент быў зарэгістраваны 11 красавіка на Нацыянальным прававым інтэрнэт-партале, аднак пакуль не апублікаваны.

Раней праезд падаражэў у іншых рэгіёнах. Такім чынам, падаражанне закранула ўсю краіну.

5 красавіка кошт праезду вырас на 10 капеек у Гродзенскай і Брэсцкай абласцях: на звычайных і хуткасных маршрутах білет падаражэў да 0,9 рубля (0,95 рубля пры куплі ў кіроўцы), а на экспрэсных маршрутах — да 1 рубля.

У канцы сакавіка праезд падаражэў на 10 капеек у Мінскай і Магілёўскай абласцях.

З 5 красавіка, у адпаведнасці з рашэннем Брэсцкага абласнога выканаўчага камітэта ад 26 сакавіка, паднялася цана праезду ў гарадскім грамадскім транспарце.

З 9 красавіка ў Мінску падаражэў праезд у грамадскім транспарце на 10 капеек, у тым ліку ў метро, паведаміла на прэс-канферэнцыі 7 красавіка ў Мінску намесніца старшыні камітэта эканомікі Мінгарвыканкама Вольга Леошка.

Яна заявіла, што ў сакавіку 2022 года “сабекошт, або фактычны кошт паездкі”, у наземным транспарце складаў 2,31 рубля, у метро — 1,91 рубля. Паводле інфармацыі прадстаўніцы Мінгарвыканкама, сабекошт праезду ў наземным транспарце складае 3 рублі, у метро з улікам адкрыцця трэцяй лініі — 2,32 рубля.

Згодна з рашэннем Мінгарвыканкама ад 27 сакавіка, кошт праезду ў гарадскім пасажырскім транспарце павялічыцца з 10 красавіка. Білет на аўтобус, тралейбус і трамвай будзе каштаваць 0,9 рубля (1 рубель пры куплі ў кіроўцы), жэтон на метро — 1 рубель. У 2022 годзе кошт праезду на аўтобусе, тралейбусе і трамваі ў Мінску павялічыўся з 0,75 да 0,85 рубля, на экспрэс-маршрутах — з 0,9 да 1 рубля, у метро — з 0,8 да 0,9 рубля.