Украіна ўвяла санкцыі супраць беларускай прапагандысткі і дзвюх арганізацый

11 красавіка, Позірк. Прапагандыстка Белтэлерадыёкампаніі Анастасія Бенедзісюк, а таксама дзве зарэгістраваныя ў Мінску арганізацыі трапілі пад санкцыі Украіны.

Згодна з указам прэзідэнта Уладзіміра Зяленскага, які зацвердзіў адпаведныя рашэнні Савета нацыянальнай бяспекі і абароны Украіны, абмежаванні тэрмінам на 10 гадоў уведзены ў дачыненні да Беларускага славянскага камітэта, старшынёй якога лічыцца былы дэпутат беларускага парламента Сяргей Касцян, а таксама арганізацыі “ЗгодаМедыя“.

Аб дзейнасці названых арганізацый практычна нічога невядома. Сярод санкцый згадваецца блакіроўка іх інтэрнэт-пляцовак.

Бенедзісюк была ўключаная ў санкцыйны спіс Еўрасаюза 3 жніўня 2023 года.

Туды таксама патрапілі прапагандысты Вадзім Гігін, Ксенія Лебедзева, Яўген Пуставой.

Раней Зяленскі ўвёў санкцыі супраць паралімпійца Аляксея Талая, фонд якога абвінавачваецца ў незаконным перамяшчэнні ўкраінскіх дзяцей з акупаваных тэрыторый.