АПК падтрымаў правядзенне марафону па зборы сродкаў для беларускіх добраахвотнікаў ва Украіне

16 красавіка, Позірк. Аб’яднаны пераходны кабінет (АПК) падтрымае арганізацыю і правядзенне марафону па зборы сродкаў для беларускіх добраахвотнікаў, якія ваююць альбо ваявалі на баку Украіны. Рашэнне аб гэтым прынята 15 красавіка на яго пасяджэнні, паведамляецца ў тэлеграм-канале кабінета.

Як адзначыла прадстаўніца па сацыяльнай палітыцы Вольга Зазулінская, марафон “можа стаць акцыяй салідарнасці, падчас якой можна акумуляваць сродкі і перадаць іх для размеркавання валанцёрскім структурам”.

Праведзены раней марафон” Нам не ўсё адно!“ добра паказаў, які насамрэч вялікі патэнцыял у беларускай салідарнасці“, — адзначыла яна і выказала меркаванне, што маральны абавязак дапамагаць добраахвотнікам “не менш, чым перад палітвязнямі”.

Прадстаўнік па абароне і нацыянальнай бяспецы Вадзім Кабанчук адзначыў, што аднымі з удзельнікаў дабрачыннага марафону ў дапамогу беларускім воінам-добраахвотнікам маглі б стаць “Фонд Кастуся Каліноўскага” і рух “Калінаўцы”. Пры гэтым ён не выключыў удзел і ў іншых зацікаўленых арганізацыях.

Адзначаецца, што ідэю марафона падтрымала і кіраўніца кабінета Святлана Ціханоўская, якая заклікала ўсіх беларусаў замежжа далучыцца да гэтай ініцыятывы.

Марафон салідарнасці з палітвязнямі “Нам не ўсё адно!” адбыўся 29–30 ліпеня 2023 года. Было сабрана 563.101,99 еўра. Камісія плацежных сістэм склала 17.161,77 еўра. Яшчэ 200 еўра з сумы былі адкліканы ахвярадаўцамі.

У выніку на рахунак фонду “21 траўня”, які займаўся акумуляваннем і размеркаваннем грошай, прыйшло 545.740,22 еўра і 12.180,51 еўра ў крыптавалюце. Агульная сума склала 557.920,73 эўра.

У зборы сродкаў прынялі ўдзел больш за 11 тыс. чалавек, ахвяраванні дасягалі 10 тыс. еўра.

Некаторыя апаненты АПК на падставе апублікаванай справаздачнасці абвінавацілі фонд у нямэтавым выкарыстанні сродкаў. Дырэктар фонду патлумачыла гэта тэхнічнай памылкай.

3 кастрычніка 2023 года Следчы камітэт паведаміў аб узбуджэнні крымінальнай справы супраць удзельнікаў марафону.

У кастрычніку мінулага года ў АПК заявілі, што другі марафон салідарнасці з палітвязнямі “Нам не ўсё адно!”, адкладзены на нявызначаны тэрмін.