Лукашэнка зноў прызнаў уплыў санкцый

20 красавіка, Позірк. Аляксандр Лукашэнка зноў прызнаў уплыў санкцый, накладзеных на яго рэжым дэмакратычнымі краінамі.

“Я пра гэта ўжо казаў у мінулы раз, у Божае Нараджэнне. Гэта няпростыя гады, асабліва гэты год. Нам трэба мабілізавацца, згуртавацца і прайсці яго. Турбулентнасць, хаос, блытаніна ў свеце велізарная. Проста мы стараемся — улады — зберагчы вас ад гэтага хаосу. <…> Але гады вельмі складаныя, вельмі цяжкія, асабліва ва ўмовах санкцый для нашай эканомікі“, — заявіў Лукашэнка, наведваючы 20 красавіка сабор пакрова прасвятой багародзіцы ў Талачыне (Віцебская вобласць).

Ён паскардзіўся, што “тым, каму нямала дапамагалі, не вельмі добра працуюць“, таму “год будзе вельмі сур’ёзны ў плане навядзення парадку ў нашай краіне”. “У нас ужо з’явіўся нейкі ўтрыманскі настрой: а, мы цяпер тут напішам у “ЦікТоку“, прэзідэнт прачытае, з усімі разбярэцца. Вельмі правільна. Будзем разбірацца з усімі”, — папярэдзіў прамоўца.

У залежнасці ад кан’юнктуры Лукашэнка прызнае ці адмаўляе ўплыў санкцый.

Напрыклад, 12 сакавіка 2025 года на нарадзе аб стане і развіцці мінеральна-сыравіннай базы ён заклікаў чыноўнікаў шукаць іншыя магчымасці збыту: “Усе кажуць — санкцыі. Для вас санкцый няма. Шукайце іншыя рынкі”.

7 сакавіка на сустрэчы са старшынёй Дзяржаўнага адміністрацыйнага савета, прэм’ер-міністрам М’янмы Лукашэнка назваў санкцыі “часам магчымасцяў“.

26 студзеня, галасуючы на “выбарах прэзідэнта“, ён заявіў, што ва ўмовах санкцый Беларусі сапраўды давялося сутыкнуцца з “некаторымі цяжкасцямі“, але ў яе “хапае партнёраў, на гэтым этапе ёсць дамоўленасць з імі пра тое, каб дзейнічаць разам”.

8 студзеня на цырымоніі ўручэння прэмій “За духоўнае адраджэнне“, спецыяльных прэмій дзеячам культуры і мастацтва і спецпрэмій “Беларускі спартыўны Алімп“ за 2024 год Лукашэнка заявіў: “Як бы хтосьці ні імкнуўся нас сёння разгайдаць, нічога не атрымаецца“. Паводле яго сцвярджэння, Беларусь вытрымае ціск “з усіх бакоў”: “Здавалася б, не, не вытрымаем. Але памятаеце мае словы? Я сказаў: забудзьцеся на санкцыі, іх няма. І гэта нас выратавала. Калі б толькі мы, беларусы, эмацыйныя людзі, акунуліся ў гэтыя разважанні аб санкцыйнай палітыцы, мы б абвалілі эканоміку, а следам і наша жыццё, і наша дзяржава“.

(Выкарыстаныя паведамленні і відэазапісы прэс-службы Лукашэнкі.)