Лукашэнка абвінаваціў сваіх праціўнікаў за мяжой у жаданні “ўзрушыць грамадства” тэмай пакістанцаў, прыцягнуў КДБ
25 красавіка, Позірк. “Зацікаўленыя” хочуць “ўзрушыць беларускае грамадства” праблемай мігрантаў, у прыватнасці тэмай прыезду ў Беларусь работнікаў з Пакістана, заявіў Аляксандр Лукашэнка 25 красавіка на нарадзе аб развіцці раёнаў Гомельскай вобласці, якія пацярпелі ў выніку катастрофы на ЧАЭС.
“КДБ даручыў: паглядзіце, праверце, адкуль ногі растуць, — цытуе спікера яго прэс-служба. — Ад збеглых глядзяць, дзе мы нешта там сказалі, каб гэта вывярнуць і ў народ укінуць. [КДБ] адну такую кропку ў Беларусі знайшлі”.
“Аказваецца, смаркач 16-гадовы. Ну не ён жа гэта прыдумаў і паглядзеў. Яму адтуль (з-за мяжы. — “Позірк”.) скінулі інфармацыю сюды: ты, давай тут, круці. Па-мойму, у Брэсцкай вобласці знайшлі такую групу”, — сцвярджае Лукашэнка.
Раней звязаны з сілавікамі тэлеграм-канал апублікаваў відэазапіс з затрыманымі за каментары і ролікі ў “ЦікТоку” 18-гадовым хлопцам і 20-гадовай дзяўчынай. Маладыя людзі выбачаліся за “распаўсюд фэйкаў” і “гнеўныя каментарыі на адрас жыхароў цудоўнай краіны Пакістана”.
23 красавіка Міністэрства ўнутраных спраў паведаміла, што выяўленыя “актыўныя правакатары, якія наўмысна спрабавалі нагнятаць абстаноўку ў краіне і маніпуляваць грамадскай думкай”, распаўсюджваючы інфармацыю пра ўезд ў Беларусь 150 тыс. грамадзян Пакістана. МУС не паведамляла, што гаворка ідзе пра непаўнагадовага грамадзяніна, як сцвярджае Лукашэнка.
Паводле сцвярджэння ведамства, “міграцыйныя плыні з Пакістана адсутнічаюць, гэтак жа як і злачынствы, здзейсненыя выхадцамі з гэтай дзяржавы”.
Пры гэтым падкрэслівалася, што на розных інтэрнэт-рэсурсах “працягвае распаўсюджвацца фэйкавая і правакацыйная інфармацыя на тэму ўезду ў Беларусь 150 тысяч грамадзян Пакістана, якія здзейснілі шэраг злачынстваў”.
За “распальванне міжнацыянальнай варожасці і дэстабілізацыю сітуацыі ў рэспубліцы будуць прыменены самыя строгія меры адказнасці, аж да крымінальнай”, прыгразіла МУС.
Пра тое, што Мінск і Ісламабад дамовіліся выпрацаваць механізм для прыезду ў Беларусь працоўных мігрантаў з Пакістана, Аляксандр Лукашэнка заявіў 11 красавіка па выніках сустрэчы з Шарыфам. Паводле яго слоў, Беларусь гатовая прыняць на працу 100–150 тыс. пакістанскіх адмыслоўцаў: “Тых галін, пра якія мы папросім”. “Кіраўніцтва Пакістана дапаможа нам падабраць такіх людзей”, — заявіў ён.
На суботніку 12 красавіка Лукашэнка адзначыў, што Беларусь зацікаўленая “перш за ўсё ў прыцягненні адмыслоўцаў, а не проста моладзі”. “І лепш — сем’ямі. Калі сям’я прыехала, яны працаваць будуць”, — падкрэсліў спікер, дадаўшы, што “падыход будзе дыферэнцыяваны”.
Пасля вяртання з Беларусі Шарыф заявіў журналістам, што “дасягнута дамоўленасць з Беларуссю пра накіраванне 150 тысяч кваліфікаваных пакістанскіх адмыслоўцаў, якія будуць адабраныя выключна на падставе заслуг”.