Варшава адкажа на вучэнні “Захад-2025” у Беларусі сваімі “вялікімі манеўрамі” — намеснік міністра абароны Польшчы

28 красавіка, Позірк. Вучэнні “Захад-2025”, якія Мінск і Масква плануюць правесці ў верасні на тэрыторыі Беларусі, не прадстаўляюць пагрозы для Польшчы, але Варшава адкажа на іх “адэкватным чынам”, заявіў у інтэрв’ю радыёстанцыі RMF FM польскі намеснік міністра нацыянальнай абароны Цэзары Томчык.

“Польшча адкажа на вучэнні “Захад-2025″, якія будуць праходзіць у Беларусі <…> адэкватным чынам з польскага боку. У Польшчы будуць буйныя польскія вучэнні і вучэнні НАТО, вялікія манеўры. Нагадаем таксама, што летась мы правялі найбуйнейшыя ў гісторыі вучэнні НАТО, у якіх узялі ўдзел каля 100 тысяч салдат. НАТО мацнейшае за Расію”, — заявіў ён.

Сёлета ў студзені начальнік дэпартамента міжнароднай вайсковай супрацы — памочнік міністра абароны Валерый Равенка паведаміў, што да манеўраў плануецца прыцягнуць больш за 13 тыс. чалавек. З гэтай прычыны ўлады ў Мінску “былі абавязаныя і ўжо апавясцілі ўсе дзяржавы — удзельнікаў Венскага дакумента” пра намер правесці такія манеўры, а таксама калі яны адбудуцца і якая іх колькасць.

Прэзідэнт Украіны Уладзімір Зяленскі неаднаразова заяўляў пра планаванае нарошчванне расійскай вайсковай моцы і магчымасці ўзброенага ўварвання арміі РФ на тэрыторыю Польшчы, Літвы і Латвіі з тэрыторыі Беларусі паводле аналогіі з падзеямі 24 лютага 2022 года. Тады расійскае ваеннае ўварванне ва Украіну часткова ажыццяўлялася з тэрыторыі Беларусі пасля заканчэння сумесных вайсковых вучэнняў.

9 красавіка міністр замежных спраў Літвы Кястуціс Будрыс заявіў у інтэрв’ю радыё LRT, што ў Вільнюсе “бачылі ўжо шмат вучэнняў “Захад” і ведаюць, як гэтыя вучэнні “пачынаюцца і плануюцца, што такое актыўная фаза і скрытыя вучэнні”. “Маштаб заўсёды ў некалькі разоў большы за заяўлены”, — заявіў ён.

“Таксама будзе шмат неабвешчаных вучэнняў, аб’яднаных у адзін агульны сцэнарый. На аснове гэтага мы зможам зрабіць высновы пра тое, да чаго рыхтуецца Расія: ці падвысіць аператыўную сумяшчальнасць з Беларуссю, як гэта рабілася раней, ці адпрацаваць пэўныя ўрокі, вывучаныя ва Украіне, з іншымі сіламі і паглядзець, як гэта можна накіраваць супраць НАТО, або паслаць нам моцны сігнал, або падрыхтавацца да магчымых іншых сцэнарыяў”, — дадаў Будрыс.

Паводле яго слоў, Літва гатовая рэагаваць на магчымыя парушэнні або інцыдэнты на мяжы падчас манеўраў. У той жа час, лічыць ён, Паўночнаатлантычны альянс павінен люстраным чынам адрэагаваць на павелічэнне колькасці расійскіх і беларускіх войскаў падчас вучэнняў, “каб Расія не стварала сабе спрыяльных умоў для якіх-небудзь дзеянняў супраць блока”.