29 красавіка, Позірк. Шэраг сустрэч у Кангрэсе ЗША ў рамках візіту ў гэтую краіну правядзе дэмакратычны лідар Святлана Ціханоўская, паведамляе яе прэс-служба.
Сустрэчы запланаваныя на 6–7 траўня.
Таксама ў гэтыя дні ў Вашынгтоне палітык возьме ўдзел у выязной сустрэчы ўдзельнікаў Мюнхенскай канферэнцыі па бяспецы і выступіць аналітычным цэнтры Інстытут Хадсона.
2–3 траўня дэмлідар будзе ўдзельнічаць у арганізаваным Інстытутам Маккейна форуме ў Седоне (Арызона).
Паведамляецца, што 4–5 траўня ў Даласе (Тэхас) Ціханоўская правядзе сустрэчы “з міжнароднымі партнёрамі”.
Па вяртанні з ЗША, 8–9 траўня, чакаецца выступ палітыка на Балтыйскай асамблеі, дзе будуць абмяркоўвацца пытанні ўмацавання рэгіянальнага супрацоўніцтва і салідарнасці.
Будучы візіт у ЗША Ціханоўская анансавала 16 красавіка ў эфіры ютуб-канала “И Грянул Грэм”. Тады палітык заявіла, што плануе сустрэцца як з прадстаўнікамі адміністрацыі прэзідэнта Дональда Трампа, так і з кангрэсменамі.
“Мы спрабуем данесці нашу пазіцыю і важнасць падтрымкі як Украіны, так і Беларусі, таму што мы лічым, што свабодная Беларусь таксама ў інтарэсах ЗША”, — сказала дэмлідар.
У 2024 годзе Ціханоўская наведвала ЗША двойчы, агулам — не менш за восем разоў.
