Ціханоўская на 1 траўня: Для ўлады чалавек не асоба, а рэсурс

1 траўня, Позірк. “Улада да гэтага часу жыве ў тым свеце, дзе чалавек не асоба, а рэсурс, які можна вычарпаць на сваю карысць”, — заявіла дэмакратычны лідар Святлана Ціханоўская ў сваім тэлеграм-канале ў сувязі з Днём працы 1 траўня.

“Сённяшняе “свята” прыйшло да нас з савецкіх часоў, калі аб рабоце гаварылі як аб гонары, аб рабочым — як аб героі. Але толькі на словах. На справе рабочы быў толькі рухавіком у вялікай сістэме, дзе чалавечае жыццё не каштавала нічога. На жаль, менавіта гэта пераняў і сучасны рэжым”, — дадала яна.

У гэтым кантэксце палітык згадала 12-гадзінныя змены, “пасля якіх не застаецца ні сіл, ні часу на сям’ю”, зарплаты, “якія ледзь пакрываюць камуналку і харчаванне”.

“Медыкам адмяняюць абяцаныя выхадныя, спасылаючыся на недахоп кадраў, а за фота з пратэстаў звальняюць чарговага работніка пасля доўгіх гадоў адданых рабоце, — дадала дэмлідар. — І гэта — на фоне гучных прамоў аб “стабільнасці” і “развіцці”. Але цэны растуць, умовы не паляпшаюцца, а прадпрыемствы ператвараюцца ў руіны”.

Людзі ў Беларусі, на думку Ціханоўскай, заслугоўваюць іншага: “прызнання, годнай аплаты, чалавечых умоў працы”.

“Вы маеце права патрабаваць павагі і чалавечага стаўлення. Маеце права планаваць жыццё без страху за пасаду, будучыню сваіх дзяцей і сваё здароўе. Клопат аб чалавеку і падтрымка — вось што павінна быць у цэнтры ўвагі дзяржавы. Бо людзі не шрубкі. Людзі — наша найвышэйшая каштоўнасць”, — склала яна.

У першамайскім віншаванні Аляксандра Лукашэнкі, распаўсюджаным яго прэс-службай, гаворыцца, што “пакладзеная ў аснову жыцця беларускага народа мірная і стваральная праца з’яўляецца ўніверсальным рэцэптам дабрабыту і згоды”: “Толькі з апорай на ўласныя сілы і таленты мы пабудавалі незалежную і паспяховую дзяржаву”.