Урад РФ ухваліў адкрыццё ва Уфе генконсульства Беларусі

12 траўня, Позірк. Урад Расіі ўзгадніў стварэнне ў Уфе генеральнага консульства Беларусі, вынікае з адпаведнай пастановы, апублікаванай на афіцыйным прававым партале РФ.

У дакуменце адзначана, што ў консульскую акруга ўвойдуць Башкартастан, Калмыкія, Удмуртыя, Астраханская, Арэнбургская і Самарская вобласці.

Міністэрству замежных спраў РФ даручана “аформіць адпаведную дамоўленасць з беларускім бокам”.

Ураду Башкартастана рэкамендавана выдзеліць ва Уфе ў гэтых мэтах “службовыя і жылыя памяшканні на ўмовах арэнды або набыцця” Беларуссю ва ўласнасць.

Акрамя гэтага, улады гэтага расійскага рэгіёну ўпаўнаважаныя “ажыццявіць пры неабходнасці адвод зямельных участкаў пад іх будаўніцтва ў адпаведнасці з заканадаўствам РФ, а таксама вырашыць іншыя арганізацыйныя пытанні”.

25 красавіка прэм’ер-міністр РФ Міхаіл Мішусцін падпісаў распараджэнне аб адкрыцці генконсульства Беларусі ў Казані (Татарстан).

Адметна, што ў кастрычніку 2024 года Савет міністраў Беларусі пастанавіў адкрыць у 2025 годзе генеральныя консульствы замест аддзяленняў пасольства ў трох расійскіх гарадах, сярод якіх Казані не было. Гаворка ішла аб Ніжнім Ноўгарадзе (планавалася адкрыць да 1 сакавіка), Калінінградзе (да 1 чэрвеня) і Уладзівастоку (да 1 верасня).

25 лістапада таго ж года аб планах Мінска адкрыць генконсульствы Беларусі ва Уфе паведаміў кіраўнік уфімскага аддзялення беларускай амбасады ў РФ Артур Карповіч на штотыднёвай аператыўнай нарадзе ў кіраўніка Башкартастана Радыя Хабірава.

2 красавіка 1996 года першы прэзідэнт РФ Барыс Ельцын і Аляксандр Лукашэнка падпісалі дагавор аб стварэнні супольнасці Беларусі і Расіі, а 2 красавіка 1997-га — дагавор аб Саюзе Беларусі і Расіі. 23 траўня 1997 года быў прыняты статут саюза. 8 снежня 1999 года падпісаны Дагавор аб стварэнні Саюзнай дзяржавы, які набыў моц 26 студзеня 2000 года.

Расія пачала фарсіраваць тэму інтэграцыі з Беларуссю ў снежні 2018 года. Дзмітрый Мядзведзеў, які займаў на той момант пасаду прэм’ер-міністра РФ, фактычна ўвязаў максімальнае збліжэнне дзвюх краін з далейшай падтрымкай Мінска з боку Масквы.