Заснаваная ў 1992 годзе “Эканамічная газета” абвясціла аб спыненні выхаду

14 траўня, Позірк. З ліпеня спыняе выпуск “Эканамічная газета”, паведаміў яе галоўны рэдактар Фёдар Велікаселец на сайце выдання.

Паводле яго слоў, такое рашэнне прыняў сход акцыянераў ЗАТ “Белбізнеспрэс”, які з’яўляецца заснавальнікам і выдаўцом медыя.

Ці будзе абнаўляцца сайт выдання, не ўдакладняецца.

Велікаселец адзначае, што цяпер няма праблем знайсці неабходную інфармацыю ў інтэрнэце, таму “папяровым выданням з іх цыкламі друку і дастаўкі даводзіцца саступаць месца электронным сродкам масавай інфармацыі”.

“Да нашых паслуг дзясяткі, калі не сотні, сайтаў, у тым ліку ўсіх міністэрстваў і ведамстваў, спецыялізаваныя парталы, розныя галіновыя выданні. Такая сітуацыя ва ўсім свеце. І наша гісторыя не выключэнне і не падстава для песімізму. Хутчэй наадварот: мы ўсведамляем тую ролю, якую адыгралі ў станаўленні новых эканамічных адносін у краіне, і, “пакідаючы сцэну”, кажам: “Місія выканана!”, — паведаміў галоўрэд.

Выданне заснаванае ў 1992 годзе, да 2005 года выходзіла як “Нацыянальная эканамічная газета”. Разавы тыраж дасягаў 40 тыс. асобнікаў.

На старонках газеты друкавалі дакументы, каментарыі да іх, тлумачэнні пытанняў гаспадарчай дзейнасці.

Такім чынам, у Беларусі не застанецца недзяржаўных грамадска-палітычных друкаваных выданняў. Пры гэтым на падтрымку прапагандысцкіх СМІ ўлады выдзяляюць з бюджэту больш за 145 млн рублёў штогод.

Сістэмныя рэпрэсіі супраць незалежных СМІ ў Беларусі працягваюцца з 2020 года. Рэдакцыі працуюць у выгнанні. Пры гэтым перад выбарамі ўзмацняецца ціск на тых, хто застаўся ў краіне, і тых, хто жыве за мяжой. У апошні час рэдакцыі масава сутыкнуліся з эканамічнымі цяжкасцямі і неабходнасцю скарачаць штаты.

Паводле звестак Беларускай асацыяцыі журналістаў, у Беларусі ў зняволенні ўтрымліваецца 39 прадстаўнікоў СМІ.