МАРГ выявіў парушэнні ў 75% правераных аб’ектаў рытуальных паслуг

15 траўня, Позірк. Па выніках праведзенага маніторынгу супрацоўнікі Міністэрства антыманапольнага рэгулявання і гандлю (МАРГ) выявілі парушэнні ў 75% аб’ектаў, якія аказваюць рытуальныя паслугі і гандлююць адпаведнымі таварамі, паведамляе прэс-служба ведамства.

Парушэнні ў асноўным датычацца “правілаў бытавога абслугоўвання ў частцы адсутнасці неабходнай інфармацыі для спажыўца”, гаворка пра “пералік аказваемых відаў паслуг, тарыфаў на гэтыя паслугі і інш.”.

У профільных гандлёвых аб’ектах “устаноўленыя парушэнні ў частцы адсутнасці пераліку тавараў, абавязковых да наяўнасці для рэалізацыі, цэннікаў на тавары, да ведама пакупнікоў не даведзена неабходная інфармацыя аб таварах”, гаворыцца вв паведамленні.

“Гаспадарчым суб’ектам накіраваныя рэкамендацыі па ліквідацыі выяўленых парушэнняў”, — адзначылі ў МАРГ.

Ведамства таксама паведаміла аб праведзеным апытанні грамадзян аб “мэтазгоднасці ўвядзення ліцэнзавання рытуальных паслуг”.

Заяўляецца, што большасць рэспандэнтаў (61%) “не ўпэўнена” ў неабходнасці такога ліцэнзавання. 39% “дадзеную прапанову” падтрымала. Усяго быў апытаны 1241 чалавек.

“Пытанні рытуальных паслуг з’яўляюцца вельмі важнымі і адчувальнымі для нашых грамадзян. МАРГ працягне ўважліва сачыць за развіццём сітуацыі на гэтым рынку”, — падкрэслілі ў ведамстве.