У Беластоку чакаецца вынясенне прысуду беларусам, абвінавачаным у продажы наркотыкаў праз інтэрнэт

19 траўня, Позірк. У Беластоку (Польшча), які знаходзіцца побач з беларускай мяжой, завяршыўся разгляд справы, у межах якой два грамадзяніны Беларусі абвінавачваюцца ва ўдзеле ў арганізаванай злачыннай групоўцы і незаконным абароце наркотыкаў у інтэрнэце, паведамляе партал мясцовага самакіравання Польшчы. Адзначаецца, што вынясенне прысуду чакаецца ў канцы траўня.

Пракуратура абвінаваціла беларусаў ва ўдзеле ў абароце наркатычных сродкаў і псіхатропных рэчываў у значных памерах у 2023-2024 гадах на працягу паўгода. Паводле звестак следства, яны “атрымлівалі партыі наркотыкаў, затым узважвалі іх, дзялілі на больш дробныя порцыі і адпраўлялі індывідуальным і аптовым атрымальнікам, большасць з якіх былі замежнікамі з усходу“. Кантакты паміж бакамі ажыццяўлялася праз інтэрнэт, заказы адпраўляліся па пошце.

Абвінавачаным 37 і 27 гадоў, яны законна пражываюць у Польшчы. Першы з іх прызнаўся ў гандлі наркотыкамі праз інтэрнэт, але адмаўляў дачыненне да арганізаванай злачыннай групоўкі, ён пакуль знаходзіцца на волі. Пракуратура просіць прысудзіць яго да 3,5 года пазбаўлення волі, абарона настойвае на “максімальна мяккім прысудзе“.

Другі беларус, які, паводле звестак следства, “займаў больш высокае становішча ў структуры гэтай злачыннай групы“, не прызнаўся ў злачыннай дзейнасці і ўжо некалькі месяцаў знаходзіцца пад вартай. Пракурор запытаў для яго пакаранне ў выглядзе 9 гадоў пазбаўлення волі, абарона лічыць магчымым яго апраўдаць.

Паведамляецца таксама, што пракуратура запатрабавала накласці на абвінавачаных штрафы ў памеры 15-20 тыс. злотых (ад 3,9 да 5,3 тыс. долараў ЗША), спагнаць з іх грашовыя сродкі на грамадскія мэты і атрыманыя ад злачыннай дзейнасці фінансавыя здабыткі.