Два чалавекі загінула ў ДТЗ у Браслаўскім раёне

22 траўня, Позірк. Два чалавекі загінула ў дарожна-транспартным здарэнні познім вечарам 21 траўня ў Браслаўскім раёне (Віцебская вобласць), паведамляе прэс-служба Міністэрства ўнутраных спраў.

З паведамлення вынікае, што каля 23:15 у раёне вёскі Відзы Лаўчынскія (за 3 км ад пасёлка Відзы, 2 км ад мяжы з Літвой) 28-гадовы кіроўца аўтамабіля “Мазда” выехаў на паласу сустрэчнага руху і збіў 63-гадовага раварыста.

Пасля сутыкнення легкавое аўто з’ехала на абочыну і перакулілася. Раварыст і 24-гадовы пасажыр “Мазды” загінулі, кіроўца аўтамабіля шпіталізаваны.

Адзначаецца, што на месцы здарэння працавалі супрацоўнікі Дзяржаўтаінспекцыі, Следчага камітэта і Міністэрства па надзвычайных сітуацыях.

Як паведамляў “Позірк”, у 2024 годзе агульная колькасць аўтамабільных аварый у Беларусі павялічылася на 8,8% у параўнанні з 2023-м (з 3.173 да 3.453). Загінула ў гадавым вымярэнні на 0,5% менш чалавек (434 супраць 436).