Польскія памежнікі затрымалі беларуса, які спрабаваў выехаць на зніклым у Францыі аўтамабілі

26 траўня, Позірк. Супрацоўнікі Надбужанскага аддзела Памежнай аховы Польшчы затрымалі ў пункце пропуску Цярэспаль (з беларускага боку — Брэст) 38-гадовага грамадзяніна Беларусі, які спрабаваў выехаць на радзіму на легкавым аўтамабілі Renault Scenic 2016 года выпуску.

Паводле інфармацыі ведамства, аўтамабіль коштам 65 тыс. польскіх злотых (17,4 тыс. долараў паводле актуальнага курсу Нацбанка Польшчы), на якім ехаў беларус, вышукваецца як зніклы ў Францыі.

Мужчыну затрымалі і разам з транспартным сродкам перадалі супрацоўнікам паліцыі Цярэспаля — “для далейшых дзеянняў”, “па справе распачатая падрыхтоўчая вытворчасць”. Адзначаецца, што затрыманаму, які падазраецца ў скупцы крадзенага, пагражае турэмнае зняволенне тэрмінам ад 3 месяцаў да 5 гадоў.