Ціханоўская ў Дзень незалежнасці Грузіі: Мы падтрымліваем ваш суверэнітэт, цэласнасць і еўрапейскія памкненні
Святлана Ціханоўская і пяты прэзідэнт Грузіі Саламэ Зурабішвілі
26 траўня, Позірк. З Днём незалежнасці Грузіі павіншавала 26 траўня народ гэтай краіны беларускі дэмакратычны лідар Святлана Ціханоўская.
“Мы цвёрда падтрымліваем ваш суверэнітэт, тэрытарыяльную цэласнасць і еўрапейскія памкненні. Беларусы і грузіны ведаюць: за свабоду трэба змагацца, і наша будучыня — з Еўропай”, — напісала палітык на сваёй старонцы ў сацыяльнай сетцы Х.
У віншаванні Ціханоўская адзначыла пятага прэзідэнта Грузіі Саламэ Зурабішвілі, якая не прызнала вынікі леташніх прэзідэнцкіх выбараў і пазіцыянуе сябе як кіраўніцу дзяржавы.
Раней Аляксандр Лукашэнка павіншаваў з Днём незалежнасці грузінскі народ і дэ-факта дзейнага прэзідэнта Міхеіла Кавелашвілі, а таксама выступіў за аднаўленне “ўзаемавыгаднага партнёрства” з Грузіяй.
У снежні 2024 года ўпершыню за часы незалежнасці Грузіі прэзідэнта абіралі не ўсеагульным галасаваннем, а праз калегію выбаршчыкаў. Кавелашвілі — адзіны кандыдат — быў вылучаны кіроўнай партыяй “Грузінская мара” (89 з 150 дэпутацкіх крэслаў) прарасійскага алігарха Бідзіны (Барыса) Іванішвілі, апрача якой у заканадаўчым органе больш нікога няма. Апазіцыйныя сілы, якія прайшлі ў парламент на леташніх выбарах, абвінавацілі “Грузінскую мару” ў фальсіфікацыях, адмовіліся прызнаваць вынікі электаральнай кампаніі і не ўдзельнічаюць у пасяджэннях. У краіне не спыняюцца акцыі пратэсту.
