БЧ папярэдзіла пра затрымку цягнікоў праз выбух на чыгунцы ў Варонежскай вобласці РФ

5 чэрвеня, Позірк. Пра часовую затрымку “асобных цягнікоў” паведаміла 5 чэрвеня прэс-служба Беларускай чыгункі.

Паводле інфармацыі БЧ, гэта звязана з “пашкоджаннем чыгуначнага палатна на перагоне Еўдакова — Сагуны Паўднёва-Усходняй чыгункі (Варонежская вобласць РФ)”.

Перавозчык адзначыў, што цягнікі БЧ № 302/301 Мінск — Адлер (адпраўленне са станцыі Мінск-Пасажырскі 4 чэрвеня 2025 года ў 11:21) і №301/302 Адлер — Мінск (са станцыі Адлер — у 17:52), “цяпер накіроўваюцца згодна з вызначаным раскладам”.

Разам з тым, як заяўлена, “магчымыя затрымкі названых цягнікоў у дарозе, звязаныя з работамі па аднаўленні чыгуначнага палатна”.

Расійскія экстраныя службы паведамлялі, што 5 чэрвеня на 725-м кіламетры чыгункі паміж станцыямі Еўдакова і Сагуны у Варонежскай вобласці быў здзейснены падрыў. Праз гэта адбылася затрымка 21 цягніка.

Напрыканцы траўня нацыянальная авіякампанія “Белавія” паведамляла пра затрымку выканання сваіх рэйсаў — праз атаку ўкраінскіх дронаў на аб’екты расійскай інфраструктуры.