Латушка абмеркаваў з кіраўніцтвам ЕСЗД праблему пераследу беларусаў за мяжой з боку рэжыму Лукашэнкі

7 чэрвеня, Позірк. Праблему пераследу рэжымам Аляксандра Лукашэнкі беларусаў, якія вымушана пакінулі радзіму і пражываюць на тэрыторыі Еўрасаюза, абмеркаваў намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка з намесніцай гендырэктара Еўрапейскай службы знешніх дзеянняў (ЕСЗД) Даротай Длоўхі-Сулігай.

Прэс-служба беларускага палітыка, якая паведаміла пра сустрэчу 7 чэрвеня, таксама адзначыла, што на ёй абмяркоўваліся “пагрозы, якія стварае рэжым Лукашэнкі для актывістаў дэмакратычных сіл”.

Бакі разгледзелі “пытанні падрыхтоўкі да пасяджэння кансультатыўнай групы “Дэмакратычная Беларусь — Еўрапейскі саюз”, якое адбудзецца ў Бруселі 11 чэрвеня”. У рамках запланаванай сустрэчы “будуць абмеркаваныя пытанні палітычнай сітуацыі ў Беларусі і яе перспектыў, стратэгіі дэмакратычных сіл Беларусі і дзеянняў ЕС, правоў чалавека і адказнасці прадстаўнікоў рэжыму Лукашэнкі, СМІ і стратэгічнай камунікацыі” ды інш.

“Павел Латушка праінфармаваў намесніцу гендырэктара ЕСЗД пра дзейнасць Аб’яднанага пераходнага кабінета Беларусі і пра працу фракцыі “Каманда Латушкі і Рух “За Свабоду” ў Каардынацыйнай радзе, а таксама адзначыў важнасць падтрымкі з боку Еўрапейскага саюза барацьбы беларусаў за свабоду і дэмакратыю і важнасць падтрымкі інстытутаў дэмакратычных сіл”, — паведаміла прэс-служба палітыка.

Акрамя таго, на сустрэчы была закранутая тэма “працягу падтрымкі беларускіх незалежных медыя і блогераў з боку Еўрапейскага саюза”. Латушка, як адзначаецца, “падкрэсліў важнасць такой падтрымкі для распаўсюду аб’ектыўнай і праўдзівай інфармацыі ў беларускім грамадстве пра злачынствы рэжыму Лукашэнкі, а таксама для супрацьдзеяння намаганням Расіі і прарасійскага рэжыму Лукашэнкі, скіраваным на змяненне поглядаў беларускага грамадства як да дзяржаўнасці, так і да дэмакратычных каштоўнасцяў”.

Для пераследу грамадзян Беларусі, якія знаходзяцца за мяжой, рэжым Лукашэнкі ўвёў у практыку працэдуру спецыяльнай вытворчасці. Яна дазваляе праводзіць завочныя суды па крымінальных справах, выносіць выракі, адбіраць маёмасць грамадзян, якія пакінулі радзіму.

Шырока прымяняецца ў дачыненні да ідэйных праціўнікаў уладаў. Спецвытворчасць нярэдка адкрываюць за дзеянні, якія рэжым Лукашэнкі лічыць незаконнымі, што здзейсненыя па-за межамі Беларусі. На падставе гэтай працэдуры, напрыклад, Латушка быў завочна прыгавораны да 18 гадоў пазбаўлення волі.