Лукашэнка ўхваліў праекты гандлёвых пагадненняў ЕАЭС з Манголіяй і ААЭ

9 чэрвеня, Позірк. Праекты гандлёвых пагадненняў Еўразійскага эканамічнага саюза (ЕАЭС) з Манголіяй і Аб’яднанымі Арабскімі Эміратамі ўхваліў 9 чэрвеня адпаведным указам Аляксандр Лукашэнка, паведамляе яго прэс-служба.

У выпадку з Манголіяй гаворка ідзе аб Часовым гандлёвым пагадненні, з ААЭ — аб Пагадненні аб эканамічным партнёрстве.

На правядзенне перамоў па праектах пагадненняў Лукашэнка ўпаўнаважыў урад.

Раней паведамлялася, што часовае пагадненне аб свабодным гандлі з Манголіяй (звычайна папярэднічае перамовам па заключэнні пастаяннага пагаднення) і пастаяннае з ААЭ могуць быць падпісаныя падчас пасяджэння Вышэйшага Еўразійскага эканамічнага савета, якое пройдзе ў Мінску ў канцы чэрвеня.

У лютым гэтага года ў МЗС Расіі паведамлялі, што ля “фінішнай рысы” знаходзіцца падрыхтоўка такога пагаднення паміж ЕАЭС і Інданезіяй.

ЕАЭС — арганізацыя рэгіянальнай эканамічнай інтэграцыі, якая валодае міжнароднай правасуб’ектнасцю. Яе паўнапраўнымі членамі з’яўляюцца Беларусь, Казахстан і Расія (з 1 студзеня 2015 года), а таксама Арменія (з 2 студзеня 2015 года) і Кыргызстан (з 12 жніўня 2015 года). Краіны-назіральнікі — Куба, Малдова, Узбекістан. Пагадненне аб зоне свабоднага гандлю з ЕАЭС падпісалі В’етнам, Іран, Сербія і Сінгапур.