За 50 месяцаў вайны Расіі супраць Украіны спажывецкія цэны ў Беларусі выраслі на 33,3%
24 траўня, Позірк. За 50 месяцаў поўнамаштабнай вайны Расіі супраць Украіны (з сакавіка 2022 года да красавіка 2026-га) спажывецкія цэны ў Беларусі выраслі на 33,3%, сведчыць праведзены “Позіркам“ аналіз масіву звестак Нацыянальнага статыстычнага камітэта.
Харчовыя тавары падаражэлі на 39%, нехарчовыя — на 24,5%, паслугі — на 34,8%.
У Расіі за 50 месяцаў вайны спажывецкая інфляцыя склала 40,3%, ва Украіне — 64%.
Сярод краін на тэрыторыі былога СССР лідар па росце цэн за гэты перыяд Казахстан — 64,3%. Далей — Украіна, Малдова (54,5%), Кыргызстан (46,4%), Узбекістан (45,4%), Расія і Беларусь.
Ніжэй інфляцыя была ў Літве (30,8%), Эстоніі (30,5%), Азербайджане (27,8%), Латвіі (27,2%), Таджыкістане (17,2%), Грузіі (16,3%) і Арменіі (16%). Публічныя даныя аб дынаміцы цэн у Туркменістане адрывістыя і таму не ўлічваюцца.
