Канцэнтрацыя асноўнай масы каштоўных папер у аднаго трымальніка памяншае ліквіднасць рынку — прадстаўнік Мінфіна пра долю дзяржавы ў акцыянерных таварыствах
18 чэрвеня, Позірк. Пад асцярожную крытыку паставіла значную долю дзяржавы — каля 75% — у структуры ўласнасці акцыянерных таварыстваў начальнік аддзела аналізу функцыянавання рынку каштоўных папер дэпартамента па каштоўных паперах Міністэрства фінансаў Таццяна Грыб у артыкуле для навукова-практычнага часопіса “Фінансы. Улік. Аўдыт” (заснавальнікі — Міністэрства фінансаў, Беларускі дзяржаўны эканамічны універсітэт, Беларускі дзяржаўны універсітэт, Белдзяржстрах).
Падкрэсліўшы, што “само па сабе гэта нядрэнна“, прадстаўнік фінансавага ведамства адзначыла, што “канцэнтрацыя асноўнай масы каштоўных папер у руках аднаго трымальніка зніжае колькасць акцый, якія знаходзяцца ў вольным звароце, і, як вынік, памяншае ліквіднасць рынку”.
Далей Грыб зрабіла яшчэ адну агаворку: “Пры гэтым трэба ўлічваць, што гэты фактар абумоўлены мадэллю сацыяльна-эканамічнага развіцця Беларусі з захаваннем дамінуючай ролі дзяржавы ў эканоміцы”.
Паводле слоў аналітыка Мінфіна, нягледзячы на “паступальны прагрэс” беларускага рынку каштоўных папер (РКП), яго патэнцыял прыцягнення грашовых рэсурсаў саступае банкаўскаму крэдытаванню.
Згодна інфармацыі Грыб, у 2024 годзе сукупны аб’ём аперацый з каштоўнымі паперамі склаў 14,8 млрд рублёў — 6% валавога ўнутранага прадукту, у тым ліку 0,5 млрд (0,2% ВУП) — з акцыямі, 14,3 млрд (5,8%) — з аблігацыямі. У параўнанні з 2023 годам зафіксаваны рост на 36,5%.
