“Банкаўскі працэсінгавы цэнтр” працягвае ліквідаваць збой, ужо не абяцаючы выправіць сітуацыю да пэўнага часу

9 ліпеня, Позірк. ААТ “Банкаўскі працэсінгавы цэнтр” працягвае “праводзіць неабходныя аднаўленчыя работы” пасля тэхнічнага збою, які, як паведамлялася раней, пацягнуў за сабой “некарэктнае адлюстраванне” балансаў на рахунках па некаторых картках “Беларусбанка”, “Белаграпрамбанка” і “Белінвестбанка”.

“Усе балансы будуць скарэктаваныя — ніякіх дзеянняў з боку кліентаў не патрабуецца. Мы робім усё магчымае для больш хуткага завяршэння работ. Будзем трымаць вас у курсе падзей”, — запэўнівае арганізацыя.

Адметна, што гэтым разам “Банкаўскі працэсінгавы цэнтр” вырашыў не абяцаць выправіць сітуацыю да пэўнага часу. Раней цэнтр тройчы абвяшчаў час, да якога плануецца ліквідаваць збой, — спачатку да 14:00, затым да 17:00 і, нарэшце, да 22:00.

Праблема выявілася 9 ліпеня каля 9:00. Збой у апаратна-праграмным комплексе прывёў да таго, што на карт-рахунках згаданых банкаў пачалі адлюстроўвацца адмоўныя балансы.