Цягнік Адлер — Мінск рухаецца з шасцігадзінным спазненнем з-за падзення абломкаў БПЛА ў Растоўскай вобласці

20 ліпеня, Позірк. Пра “затрымку больш за 6 гадзін” у руху цягніка № 301 Адлер — Гомель — Мінск паведамляе тэлеграм-канал Беларускай чыгункі.

Прычынай называецца “пашкоджанне кантактнай сеткі 19 ліпеня 2025 года на станцыі Ліхая ў Растоўскай вобласці (Расійская Федэрацыя)”.

Адзначаецца, што цягнік выехаў з Адлера (РФ) 18 ліпеня а 17:52.

Як паведаміла 19 ліпеня АТ “Федэральная пасажырская кампанія” (ФПК, даччыная кампанія Расійскіх жалезнх дарог), 75 пасажырскіх цягнікоў “ідуць з затрымкамі пасля прыпынення руху на перагоне Ліхая — Замчалава ў Растоўскай вобласці”.

Парушэнне графіка руху адбылося “ў сувязі з пашкоджаннем кантактнай сеткі праз падзенне абломкаў БПЛА”.

20 ліпеня ФПК паведаміла аб затрымцы руху 132 цягнікоў.

Растоўская вобласць мяжуе з Украінай, дзе з 24 лютага 2022 года працягваецца вайна, развязаная Расіяй пры падтрымцы беларускіх уладаў.