Эксперт BEROC: Гонка заробкаў будзе паступова запавольвацца
21 ліпеня, Позірк. Заробкі ў Беларусі працягнуць расці ў другім паўгоддзі 2025 года, заявіў на брыфінгу 21 ліпеня старшы навуковы супрацоўнік даследчага цэнтра BEROC Анатоль Харытончык.
Эксперт удакладніў, што ў рэальным выражэнні гэта будзе адбывацца “крыху павольней”, паколькі “паскорылася інфляцыя” (як паведамляў “Позірк”, спажывецкія цэны ў чэрвені 2025 года выраслі на 0,9%, у параўнанні са снежнем 2024 года — на 5,4%, з чэрвенем 2024-га — на 7,3%).
“Калі патрэбная працоўная сіла, то наймальнік вымушаны будзе падвышаць заробак, — лічыць эканаміст. — Пакуль фінансавае становішча, вядома, не лепшае, але яно і не крытычнае. Таму гонка заробкаў будзе паступова запавольвацца. Аднак сёлета можам чакаць выніковы рост на каля 10%”.
На думку Харытончыка, у 2026 годзе “не будзем бачыць такія тэмпы росту заробкаў”. “Гэта будуць адназначныя велічыні — 1–2% у рэальным выражэнні”, — дадаў ён.
Намінальны налічаны сярэдні заробак работнікаў Беларусі ў траўні 2025 года склаў 2.652,3 рубля — на 19,5% больш, чым годам раней (2.219,2).
Медыяны заробак за травень 2025 года склаў 2.014 рублёў — на 19,3% больш, чым годам раней (1.688,3).
Па выніках студзеня — мая рэальны заробак ў Мінскай вобласці стаў больш на 13%, Магілёўскай — на 12,8%, Брэсцкай — на 12%, Віцебскай — на 11,6%, Гродзенскай — на 11,4%, Гомельскай — на 10,9%, Мінску — на 9,3%.
Рэальныя грашовыя даходы насельніцтва Беларусі за пяць месяцаў выраслі на 10,5% да таго ж перыяду 2024-га, сведчыць праведзены “Позіркам” аналіз даных Нацыянальнага статыстычнага камітэта.
У студзені рост складаў 13,8%, студзені — лютым — 12,5%, студзені — сакавіку — 12%, студзені — красавіку — 10,8%. Такім чынам, чацвёрты месяц назіраецца запаволенне гэтага працэсу.
Па выніках 2024 года названыя даходы павялічыліся на 9,7%, 2023-га — на 6,3%, 2022-га — на 3,6%.
Згодна з зацверджанымі Аляксандрам Лукашэнкам важнейшымі эканамічнымі прагнознымі (дэ-факта — планавымі) параметрамі на 2025 год, рэальныя наяўныя грашовыя даходы насельніцтва павінны вырасці на 4%.
