У Ганцавіцкім раёне міліцыянт прастрэліў нагу п’янаму мужчыну пры затрыманні

23 ліпеня, Позірк. Міліцыя са стралянінай затрымала 49-гадовага п’янага мужчыну ў адной з вёсак Ганцавіцкага раёна (Брэсцкая вобласць), вынікае з паведамлення прэс-службы Міністэрства ўнутраных спраў.

Паводле інфармацыі ведамства, 73-гадовая жанчына паведаміла ў міліцыю, што яе сусед бегае па вуліцы і неадэкватна паводзіцца.

МУС сцвярджае, што пры з’яўленні міліцыянтаў мужчына “ўзяў у руку нож і накіраваўся ў іх бок, неаднаразовыя законныя патрабаванні супрацоўнікаў спыніцца і кінуць халодную зброю праігнараваў, ствараючы рэальную пагрозу жыццю і здароўю навакольных”.

Каб спыніць нападніка, адзін з міліцыянтаў стрэліў яму ў нагу. Пасля гэтага мужчыне аказалі першую дапамогу і перадалі медыкам.

Распачатая крымінальная справа за “гвалт або пагрозу прымянення гвалту ў дачыненні да супрацоўніка органаў унутраных спраў”. Фігуранту пагражае да 7 гадоў пазбаўлення волі.

МУС нагадвае, што супрацоўнік органаў унутраных спраў пры выкананні службовых абавязкаў з’яўляецца прадстаўніком улады і знаходзіцца пад абаронай дзяржавы. Замах на яго ў любых формах цягне спыненне такіх дзеянняў, у тым ліку з выкарыстаннем фізічнай сілы, спецсродкаў і зброі.

16 чэрвеня для затрымання нецвярозага кіроўцы ў Гомельскай вобласці супрацоўнікі Дзяржаўтаінспекцыі стралялі па аўтамабілі, 11 лютага паведамлялася пра выкарыстанне ДАІ табельнай зброі для затрымання парушальніка ў Асіповіцкім раёне, 9 лютага — у Чэрыкаўскім раёне (абодва — Магілёўская вобласць), 29 студзеня — у Мазырскім раёне.