11 верасня, Позірк. Супрацоўнікі Дзяржаўтаінспекцыі прымянілі зброю, каб спыніць правапарушальніка ў Гродзенскай вобласці, паведаміла 11 верасня прэс-служба Міністэрства ўнутраных спраў.
Інцыдэнт адбыўся паблізу п. Карэлічы. Інспектары ДАІ Навагрудскага РАУС “падалі сігнал аб спыненні” кіроўцу аўтамабіля “Фольксваген”, той яго праігнараваў, пасля чаго “пачаўся пераслед”.
“На неаднаразовыя законныя патрабаванні спыніцца парушальнік не рэагаваў, віляючы па праезнай частцы, выязджаючы на абочыну, ствараючы рэальную пагрозу жыццю і здароўю іншых удзельнікаў дарожнага руху”, — гаворыцца ў паведамленні МУС.
Аўтамабіль удалося спыніць толькі пасля “прыцэльных стрэлаў па колах”.
Парушальнікам аказаўся 35-гадовы бяспраўнік — мясцовы жыхар. Медыцынскі агляд паказаў 1,8 праміле ў яго крыві.
Затрыманаму за нецвярозае кіраванне пагражае штраф у памеры 200 базавых велічыняў (8,4 тыс. рублёў). Акрамя таго, у дачыненні да яго адкрыты адміністрацыйныя вытворчасці за парушэнне іншых ПДР.
У ноч на 8 верасня супрацоўнікі ДАІ стралялі, каб спыніць правапарушальніка ў Магілёўскім раёне, у ноч на 4 жніўня супрацоўнікі ДАІ прымянілі зброю, каб спыніць аўтамабіль каля зоны адпачынку “Клецкая сажалка” (Клецкі раён Мінскай вобласці).
16 чэрвеня паведамлялася аб аналагічных дзеяннях супрацоўнікаў Дзяржаўтаінспекцыі для затрымання парушальніка ў Кастрычніцкім раёне (Гомельская вобласць), 11 лютага — у Асіповіцкім раёне, 9 лютага — у Чэрыкаўскім раёне (абодва — Магілёўская вобласць), 29 студзеня — у Мазырскім раёне (Гомельская вобласць).
Аўтарызавацца
Забыліся пароль?
Выхад з профілю
