Усе асноўныя замежныя валюты патаннелі перад выходнымі
12 верасня, Позірк. Усе асноўныя замежныя валюты патаннелі на таргах Беларускай валютна-фондавай біржы 12 верасня 2025 года.
Курс долара знізіўся да 3,0818 рубля (-0,5%; -0,0156), расійскага рубля — да 3,6268 за 100 (-0,01%; -0,0003), юаня — да 4,3025 за 10 (-0,5%; -0,0218), еўра — да 3,5911 рубля (-0,25%; -0,0089).
На гэтым працоўным тыдні (8–12 верасня) долар падаражэў на 2,41% (з 3,0094 да 3,0818), еўра — на 3,01% (з 3,4863 да 3,5911), юань — на 2,41% (з 4,2011 да 4,3025 за 10); расійскі рубель патаннеў на 1,86% (з 3,6955 да 3,6268 за 100).
9 верасня Аляксандр Лукашэнка на нарадзе з апаратам Нацыянальнага банка і кіраўніцтвам банкаў падкрэсліў, што “сітуацыя на валютным рынку павінна заставацца кантраляванай”. “Пры гэтым па-ранейшаму неабходна не дапускаць празмернай валацільнасці абменнага курсу нацыянальнай валюты“, — сказаў ён.
Даследчы цэнтр BEROC спрагназаваў дэфіцыт знешняга гандлю таварамі і паслугамі на ўзроўні 2% ВУП, які будзе суправаджацца “умераным ціскам на валютным рынку“.
Афіцыйны курс долара ў Беларусі за студзень — жнівень 2025 года знізіўся на 14,3% (з 3,4735 да 2,9769 рубля) — гэта другое месца на тэрыторыі былога СССР, сведчыць праведзены “Позіркам“ параўнальны аналіз каціровак цэнтрабанкаў на 31 снежня 2024 года і 31 ліпеня 2025-га (па выніках студзеня, студзеня — лютага, студзеня — сакавіка, студзеня — красавіка, студзеня — траўня, студзеня — чэрвеня, студзеня — ліпеня таксама другое месца, -1,73%, -8,54%, -10,25%, -12,16%, -13,7%, -14,6%, 12,97% адпаведна).
У 2024 годзе афіцыйны курс долра ў Беларусі вырас на а9,32% (з 3,1775 да 3,4735 рубля). Гэта чацвёрты паказчык на тэрыторыі былога СССР.
