Галоўчанка прызнаў, што ўлады не змогуць выканаць заданне Лукашэнкі і ўтрымаць інфляцыю ў межах 5%

15 верасня, Позірк. Нягледзячы на ​​тое, што “ад сярэднетэрміновай мэты — інфляцыі ў 5%” — улады не адмаўляюцца, сёлета, хутчэй за ўсё, “яна будзе крыху вышэй за гэты таргет”, заявіў кіраўнік Нацыянальнага банка Раман Галоўчанка ў інтэрв’ю тэлеканалу “Беларусь 1”, якое выйшла ў эфір 14 верасня.

“Не будзе ў нас цалкам магчымасці ўкласціся ў 5%, — падкрэсліў ён. — Але, яшчэ раз, гэта будзе залежаць ад існай сітуацыі на міжнародных рынках, імпартных цэн”.

Кіраўнік рэгулятара адзначыў, што ў жніўні інфляцыя знізілася на 0,3 працэнтнага пункта, але “пакуль усё адно гэта 7%”: “Нагадаю, што папярэднія тры гады ў нас інфляцыя не перавышала 6%. Гэта было добра. Сёлета яна крыху вышэйшая”.

Паводле яго сцвярджэння, Нацбанк пільна сочыць за гэтай сітуацыяй. “Асноўны ўнёсак у рост цэн дае не больш за 20 узбуйненых таварных пазіцый. Перш за ўсё гэта мясныя прадукты, малочныя прадукты, напоі, сектар грамадскага харчавання. На думку экспертаў, такім чынам згаданыя галіны аднаўляюць сваю эканамічную эфектыўнасць ва ўмовах пастаяннага росту цэн на сыравіну, на імпартаваныя тавары, якія выкарыстоўваюцца ў вытворчасці”.

Праінфляцыйнымі фактарамі ён назваў “сітуацыю дэфіцыту на рынку працы” і “рост цэн на імпартныя тавары”.

Разам з тым з пункту гледжання манетарных фактараў (памеру грашовай масы, кошту крэдытных рэсурсаў) “такога сур’ёзнага ўплыву”, паводле слоў Галоўчанкі, не відаць.

“Нацыянальны банк праводзіць і ў найбліжэйшы час будзе вельмі дбайна маніторыць і кантраляваць аб’ём грашовай прапановы. Ён не павінен перавышаць на год 10–12%. Вельмі важна кантраляваць гэтыя працэсы”, — падсумаваў чыноўнік.

Спажывецкія цэны ў жніўні 2025 года знізіліся на 0,3%, у параўнанні са снежнем 2024 года выраслі на 5,3%, у гадавым вымярэнні (да жніўня 2024 года) павялічыліся на 7,2%.

Міністэрства антыманапольнага рэгулявання і гандлю пастановай № 4 ад 27 студзеня вызначыла паказчыкі штомесячнага (з нарастаннем) дапушчальнага павелічэння цэн: у студзені цэны не павінны былі вырасці больш як на 0,7% (па факце — +0,7%), па выніках студзеня — лютага — на 1,9% (+2%) студзеня — красавіка — на 2,7% (+3,8%), студзеня — траўня — на 3% (+4,5%), студзеня — чэрвеня — 3,3% (+5,4%), студзеня — ліпеня — 3,4% (+5,6%), студзеня — жніўня — 3,4% (+5,3%).

Далей: студзеня — верасня — 3,7%, студзеня — кастрычніка — 4,1%, студзеня — лістапада — 4,4%, студзеня — снежня — 5% (гэты ўзровень зацверджаны Аляксандрам Лукашэнкам на 2025 год).

Тэндэнцыю інфляцыі, якая ўсё расце, “неабходна пераламаць”, заявіў Лукашэнка 9 верасня ў Мінску на нарадзе з апаратам Нацыянальнага банка і кіраўніцтвам банкаў.

На яго думку, “роля Нацбанка ў гэтым працэсе наогул пакуль слаба прасочваецца”.

“Нізкая інфляцыя патрэбная нашым прадпрыемствам для планавання доўгатэрміновых інвестыцый, — падкрэсліў Лукашэнка. — А людзям — для таго, каб не падала іх пакупніцкая здольнасць і не абясцэньваліся даходы і ашчаджэнні”.

Кажучы пра асноўныя задачы для банкаўска-фінансавай сістэмы, ён заявіў, што важна “забяспечыць фінансавую стабільнасць”.

Эканоміка Беларусі пры адсутнасці моцных знешніх шокаў “працягне функцыянаваць у стане перагрэтага залішняга ўнутранага попыту”, вынікала з агляду манетарнага асяроддзя за другі квартал 2025 года, прадстаўленага даследчым цэнтрам BEROC.

На думку экспертаў, “гэта будзе суправаджацца высокай [гадавы] інфляцыяй”, якая “можа наблізіцца да верхняй мяжы дыяпазону 7–9% да канца гэтага года”.

Старшы навуковы супрацоўнік даследчага цэнтра BEROC Анатоль Харытончык на брыфінгу 25 чэрвеня зазначыў, што інфляцыя ў Беларусі “пачынае тэставаць гранічныя ўзроўні, якія ўлады краіны гатовыя дазволіць для кароткатэрміновага стымулявання росту ВУП праз залішне мяккую эканамічную палітыку — 7–9% у гадавым вылічэнні па выніках 2025 года”.